بۇل - «Hi-Tech» ءىس-شاراسىنىڭ ءبىرىنشى كۇنىنىڭ ناتيجەسى. ولاردىڭ ەكەۋى – رەسەي فەدەراسياسىنىڭ ازاماتى.
الماتى كريمينالدىق پوليسياسىنىڭ حابارلاۋىنشا، شەتەلدىكتەر 65 جاستاعى زەينەتكەردى الداپ كەتكەن: ولار ونىڭ تەلەفونىنا ۆيرۋستىق باعدارلامانى جۇكتەپ الۋعا كوندىرىپ، ونىڭ كومەگىمەن ۇيالى بانكينگكە قاشىقتان قول جەتكىزگەن، سودان كەيىن شوتىنان 10 ميلليون تەڭگە جىمقىرعان، دەپ حابارلايدى Almaty-akshamy.kz.
«جۇرگىزىلگەن جەدەل-ىزدەستىرۋ ءىس-شارالارىنىڭ ناتيجەسىندە كۇدىكتىلەر – 1977 جىلى تۋعان ب.ەسىمدى ازامات جانە 1985 جىلعى م.ەسىمدى ازامات ۇستالدى. قولعا تۇسكەن 46 جانە 38 جاستاعى ازاماتتار قاماۋعا الىندى. تاعى ءبىر جاعدايدا 38 جاستاعى جەرگىلىكتى تۇرعىن الاياقتىقپەن اينالىسقان. ول ادامداردى الداۋ، سەنىمگە قيانات كەلتىرۋ ارقىلى تانىسىنىڭ جەكە كۋالىگى مەن بانك كارتاسىنىڭ سۋرەتىن پايدالانىپ، ونىڭ اتىنا جالپى سوماسى 1،3 ملن تەڭگەگە نەسيە راسىمدەگەن»، – دەدى الماتى قالالىق پوليسيا دەپارتامەنتى باستىعىنىڭ ورىنباسارى ديدار احانوۆ.
ەسكە سالا كەتەيىك، الماتىدا 20 قاراشا مەن 22 قاراشا ارالىعىندا ينتەرنەت-الاياقتىقپەن كۇرەسۋ شارالارىنىڭ تيىمدىلىگىن ارتتىرۋعا باعىتتالعان “Hi-Tech” جەدەل الدىن الۋ ءىس-شاراسى جۇرگىزىلىپ جاتىر.
«ينتەرنەت جەلىسىنىڭ تانىمال بولۋىمەن قىزمەتتەردى جانە كوپتەگەن قىزمەت ءتۇرىن سيفرلاندىرۋمەن ينتەرنەتتەگى الاياقتىقتىڭ ادىستەرى مەن تۇرلەرى، سونداي-اق اقپاراتتىق-كوممۋنيكاسيالىق جەلىلەردى پايدالاناتىن ۇرلىق كوبەيىپ كەلەدى، سوندىقتان ءبىز ازاماتتاردى ينتەرنەتتەگى الاياقتىق جانە ولاردى ونلاين قىزمەتتەردى پايدالانۋدا، سونداي-اق ينتەرنەت ارقىلى تاۋار ساتىپ الۋدا ساق بولۋعا شاقىرامىز»، – احانوۆ.