الماتى قالاسىنىڭ پوليسەيلەرى ساموكات جۇرگىزۋشىلەرىنە ءتۇسىندىرۋ جۇمىستارىن جۇرگىزىپ جاتىر، – دەپ حابارلايدى Almaty-akshamy.kz Polisia.kz-كە سىلتەمە جاساپ.
الماتى قالالىق پد-نىڭ پاترۋلدىك پوليسياسى جانە مامانداندىرىلعان باتالونىنىڭ ينسپەكتورلارى قر-نىڭ «جول قوزعالىسى تۋرالى «زاڭىنا ەنگىزىلگەن وزگەرتۋلەر مەن تولىقتىرۋلار بويىنشا قۇقىقتىق ءتۇسىندىرۋ جۇمىستارىن باستادى. اتاپ ايتقاندا، زاڭ «ەلەكترلى ساموكات» ۇعىمىمەن تولىقتىرىلعان، ول ماكسيمالدى جىلدامدىعى 25 كم/ساع اسپايتىن كولىك قۇرالى رەتىندە قاراستىرىلادى. ەنگىزىلگەن وزگەرىستەرگە سايكەس، ەلەكترلى ساموكات جۇرگىزۋشىلەرى ۆەلوسيپەد جولىمەن قوزعالادى. ولار بولماعان جاعدايدا، زاڭدا بەلگىلەنگەن شارتتار مەن تىيىم سالۋلاردى ەسكەرە وتىرىپ، ەلەكترلى ساموكاتتارعا ءجۇرۋ بولىگىنىڭ وڭ جاق جيەگىمەن جۇرۋىنە رۇقسات ەتىلەدى.
سونىمەن قاتار ەلەكترلى ساموكاتتاردىڭ جۇرگىزۋشىسى كەمىندە 18 جاستا بولۋى كەرەك، ول باسىنا دۋلىعا جانە ۇستىنە شاعىلىستىراتىن كيىم كيۋى قاجەت، سونداي-اق كەز كەلگەن ساناتتاعى جۇرگىزۋشى كۋالىگى بولۋى شارت.
جولدىڭ ءجۇرىس بولىگىنىڭ وڭ جاق شەتىندە، ونىڭ ىشىندە مارشرۋتتىق كولىكتەرگە ارنالعان جولاقپەن ەلەكتر ساموكاتتارىن جۇرگىزۋ كامەلەتتىك جاسقا تولعان جانە كەز كەلگەن ساناتتى جۇرگىزۋگە قۇقىعى بار ادامدارعا رۇقسات ەتىلەدى.
ەرەجەلەردىڭ ءبىرىن بۇزعان جاعدايدا جۇرگىزۋشىلەر ق ر اقبتك-نىڭ 593-بابى جانە ق ر اقبتك-نىڭ 620-بابىمەن جاۋاپكەرشىلىككە تارتىلادى
اتالعان باپتاردىڭ سانكسيالارى بويىنشا قۇقىق بۇزۋشىلارعا 5 اەك كولەمىندە اكىمشىلىك ايىپپۇل سالىنادى.
قۇقىق بۇزۋشىلار پاترۋلدەۋ بارىسىندا، سونداي-اق جول قوزعالىسى قاۋىپسىزدىگىن قامتاماسىز ەتۋ سالاسىنداعى جەدەل-پروفيلاكتيكالىق ءىس-شارالاردى جۇرگىزۋ بارىسىندا انىقتالاتىن بولادى. زاڭناماعا وزگەرتۋلەر مەن تولىقتىرۋلار العاشقى رەسمي جاريالانعان كۇنىنەن كەيىن كۇنتىزبەلىك الپىس كۇن وتكەن سوڭ قولدانىسقا ەنگىزىلەدى.