الماتىدا پوليسەيلەردىڭ قوعامدىق كومەكشىلەرىنە 18 ملن تەڭگەگە قولداۋ كورسەتىلدى
الماتىدا پوليسيانىڭ قوعامدىق كومەكشىسى ۇلان سالاۆاتوۆتىڭ ارقاسىندا ۇزاق ۋاقىت بويى ەسىرتكى تاراتۋمەن اينالىسقان قىلمىستىق توپ اشكەرەلەندى، دەپ حابارلايدى قازاقپارات ءتىلشىسى.
جالپى، الماتى قالاسىندا پوليسياعا كومەك كورسەتەتىن سەگىز قوعامدىق بىرلەستىك بار، بارلىعى 520 ادام.
«قالالىق پوليسيانىڭ قوعامدىق كومەكشىلەرىنىڭ، سونداي-اق قوعامداعى وقيعالارعا نەمقۇرايلى قارامايتىن ازاماتتارىمىزدىڭ جۇمىسىن ەرەكشە اتاپ وتكىم كەلەدى. ولاردىڭ كومەگىنىڭ ارقاسىندا كوپ قىلمىستىڭ بەتى اشىلىپ وتىر. ماسەلەن، وتكەن جىلى پوليسياعا كومەك كورسەتكەن 520 پوليسيانىڭ قوعامدىق كومەكشىسىن 18 ميلليون تەڭگەگە ماراپاتتادىق. مىسالى، قالا تۇرعىنى ۇلان سالاۆاتوۆتىڭ ارقاسىندا ۇزاق ۋاقىت بويى ەسىرتكىنى جاسىرىپ تاراتۋمەن اينالىسقان قىلمىستىق توپ اشكەرە بولدى. قالامىزدىڭ قوعامدىق تارتىبىنە بەي-جاي قارامايتىن وسىنداي بەلسەندى ازاماتتاردىڭ كوبەيگەنىن قالايمىن، – دەدى قانات تايمەردەنوۆ.
سونداي-اق، ول الماتى پوليسياسى قالاداعى قاۋىپسىزدىكتى قامتاماسىز ەتۋ، قىلمىسپەن كۇرەسۋ، ازاماتتاردىڭ كونستيتۋسيالىق قۇقىقتارى مەن بوستاندىقتارىن قورعاۋ ءۇشىن بار كۇش-جىگەرىن سالاتىنىن اتاپ ءوتتى.