الماتى پوليسەيلەرى قان تاپسىرىپ، يگى ءىس جاسادى

قالانىڭ ءتارتىپ ساقشىلارى 10 ليتر قان تاپسىردى

ق ر ىشكى ىستەر مينيسترلىگىنىڭ باستاماسىمەن باستالعان قايىرىمدىلىق ەستافەتاسى اياسىندا الماتى پوليسەيلەرى قان قورىن تولىقتىردى. يگى ءىس جاساۋ ءۇشىن 50 ءتارتىپ ساقشىسى قالالىق قان ورتالىعىنا بارىپ، قان تاپسىردى، دەپ حابارلايدى Almaty-akshamy.kz

«بۇگىندە قان تاپسىرعان ءاربىر پوليسەي وسى ساتتە حالىقتىڭ قولداۋىنا مۇقتاج جاننىڭ ومىرىنە تىكەلەي قاتىستى. ءبىز ءۇشىن دونورلىق – ەڭ الدىمەن ازاماتتىق بورىش، سوسىن جاناشىرلىق جانە قايىرىمدىلىق. ءبىز دونورلىق قوزعالىستىڭ دامۋىنا زور ۇلەس قوسا الدىق دەپ سەنەمىز. پوليسيا قىزمەتكەرلەرىنىڭ اراسىندا قان توبى سيرەك كەزدەسەتىن جاندار دا بار، ولاردىڭ قانى تاپشى بولىپ تابىلادى. بىزگە ازاماتتاردىڭ كونستيتۋسيالىق قۇقىقتارى مەن بوستاندىقتارىن قورعاۋ تۋرالى انت تاپسىرىلدى، سوندىقتان بۇگىنگى ىس-ارەكەتتى العا قويىلعان مىندەتتەردى ورىنداۋدىڭ ءبىر ءادىسى دەپ ساناۋعا بولادى. ءبىز تاپسىرعان قان بىرەۋدىڭ ءومىرىن ساقتايدى دەپ سەنەمىز. ءسىزدىڭ مۇقتاج جانعا كومەكتەسكەنىڭىزدى سەزىنۋىڭىزدىڭ ءوزى جەكە قۇراممەن جۇمىس ىستەۋ بارىسىندا تاربيەلەنۋشىلەرگە جاقسى اسەر ەتەدى»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسى باستىعىنىڭ ورىنباسارى ساعىندىق اياعانوۆ.

پوليسيا بولىمشەسىنىڭ باسشىلىعى دا وسىنداي ومىرلىك مىسالدارعا سۇيەنە وتىرىپ، بۇگىنگى تاڭدا پوليسەيلەردىڭ جاس ۇرپاعى ىنتىماق پەن ادامگەرشىلىكتىڭ باعاسىن تۇسىنەتىنىن اتاپ ءوتتى. ال قاتاردا جانى ساۋ جىگىتتەردىڭ بارىن ەسكەرگەن ءتارتىپ ساقشىلارى قاجەت بولسا، دونورلىق قوزعالىستى تۇراقتى تۇردە تاجىريبەلەۋگە دايىن.