الماتى پوليسەيلەرى قالانى قاردان تازارتۋعا قول ۇشىن سوزدى

الماتىدا پوليسەيلەر كوممۋنالدىق قىزمەتتەرگە قالانى قاردان تازالاۋعا كومەكتەسىپ جاتىر.

قالىڭ جاۋعان قاردى تازالاۋ كەزىندە پاترۋلدىك پوليسيا پولكى مەن مامانداندىرىلعان باتالوننىڭ 25 ەكيپاجى قار تازالاۋ تەحنيكاسىنا جول باستاپ ءجۇردى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

ماقسات – جول قاۋىپسىزدىگىن قامتاماسىز ەتۋ، جول-كولىك وقيعالارىن ازايتۋ جانە ازاماتتارعا ءقاۋىپسىز جاعداي جاساۋ.

«سونىمەن قاتار قالانىڭ نەگىزگى ماگيسترالدارىندا كەشكى ۋاقىتتا قوزعالىس قولمەن رەتتەۋ ارقىلى قامتاماسىز ەتىلدى. سوڭعى تاۋلىكتە قالادا بارلىعى 22 جول-كولىك وقيعاسى تىركەلدى. قازا تاپقاندار جوق. تولاسسىز جاۋعان قار قالاداعى جول جاعدايىن ايتارلىقتاي قيىنداتقانى انىق: كەپتەلىس پايدا بولىپ، كولىكتەردىڭ جولدا ءجۇرۋى قيىندادى. ءبىراق تاجىريبە كورسەتكەندەي، كوبىنەسە بۇل قۇبىلىستار جول قوزعالىسىنا قاتىسۋشىلاردىڭ ناشار تارتىبىنەن تۋىندايدى: كەيبىر جۇرگىزۋشىلەر جىلدامدىقتى تومەندەتپەيدى، اپاتتىق جاعدايلار، ءقاۋىپتى مانيەۆرلەر جاسايدى، بىر-بىرىنە قۇرمەت كورسەتپەيدى، جاياۋ جۇرگىنشىلەر دۇرىس ەمەس جەردەن جولدان وتەدى. وسى فاكتورلار جالپى جول جاعدايىنا كەرى اسەر ەتەدى»، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ.

اۋا رايىنىڭ ناشارلاۋىنا بايلانىستى الماتىلىق ءتارتىپ ساقشىلارى جول قوزعالىسىنا قاتىسۋشىلاردى قاۋىپسىزدىك شارالارىن كۇشەيتۋگە شاقىرادى. سونداي-اق پوليسيادا جولدىڭ قاتەلىكتى كەشىرمەيتىنىن ەسكە سالدى. جول قوزعالىسى ەرەجەلەرىن ساقتاۋ – ءسىزدىڭ جانە جاقىندارىڭىزدىڭ ءومىرىنىڭ قاۋىپسىزدىگىنىڭ كەپىلى!