الماتى پوليسەيلەرى پاتەر كارتالارىن نە ءۇشىن تولتىرۋ كەرەكتىگىن ءتۇسىندىردى

«ۋچاسكە» رەسپۋبليكالىق جەدەل الدىن الۋ ءىس-شاراسى وتكىزىلۋدە

الماتى پوليسياسىندا پاتەر كارتالارىن نە ءۇشىن تولتىرۋ كەرەكتىگىن ءتۇسىندىردى،  دەپ حابارلايدى Almaty-akshamy.kz  Polisia.kz-كە سىلتەمە جاساپ.

الماتى قالالىق پوليسيا دەپارتامەنتى 1 قىركۇيەك پەن 1 جەلتوقسان ارالىعىندا شاھاردا پروبلەمالىق ماسەلەلەردى زەردەلەۋ بويىنشا اكىمشىلىك ۋچاسكەدە حالىقتى بارىنشا قامتۋعا باعىتتالعان “ۋچاسكە” رەسپۋبليكالىق جەدەل الدىن الۋ ءىس-شاراسى وتكىزىلىپ جاتقانىن حابارلايدى.

«اكىمشىلىك اۋماقتارداعى ءاربىر ءۇيدى جانە اۋلانى ارالاۋ ءبىرىنشى كەزەكتە قىلمىستىق احۋالدى جاقسارتۋعا، زاڭسىز ارەكەتتەرمەن اينالىساتىن ادامداردى، كۇدىكتى ازاماتتاردى انىقتاۋعا، پاتەرلەر مەن ۇيلەردى زاڭسىز جالعا بەرۋ فاكتىلەرىن انىقتاۋعا باعىتتالعان. بۇل ءىس-شارالار قىلمىستىڭ الدىن الۋ ماقساتىندا دا وتكىزىلۋدە. ءجاى كەزىندە وزدەرىنە بەكىتىلگەن اكىمشىلىك ۋچاسكەلەردەگى ۋچاسكەلىك پوليسيا ينسپەكتورلارى اۋلا مەن پاتەردى ارالاۋدى جۇرگىزەدى، ونى ءتۇرلى قۇقىق بۇزۋشىلىق جاساعان ادامداردى انىقتاۋ جانە ىشكى ىستەر ورگاندارىندا ەسەپتە تۇرعان ازاماتتاردى تەكسەرۋ ماقساتىندا جاسايدى»، – دەدى الماتى قالاسى پد جەرگىلىكتى پوليسيا قىزمەتى باسقارماسىنىڭ باستىعى ماناپ ساتتاروۆ.

سونىمەن قاتار، قوعامعا جات ارەكەتتەر مەن قاراۋسىزدىق فاكتىلەرىنىڭ جولىن كەسۋ ءۇشىن جالدامالى پاتەرلەردى، بازارلاردى جانە باسقا دا ساۋدا ورىندارىن، تۇرمىسى ناشار وتباسىلاردى، جاستار مەن كامەلەتكە تولماعاندار جۇرەتىن ورىنداردى، سونداي-اق ازاماتتىق قارۋ يەلەرى مەن شەتەلدىكتەردى تەكسەرەدى. سونىمەن قاتار، ساياجايلاردى، قۇرىلىس نىساندارىن، ونىڭ ىشىندە توقتاتىلعان جانە قاراۋسىز قالعانداردى، شاتىرلار مەن جەرتولەلەردى تەكسەرۋ جۇرگىزىلەدى.

«سونداي-اق، پاتەر كارتالارىن بىرنەشە جىل بۇرىن جەرگىلىكتى پوليسيا قىزمەتى، اكىمشىلىك اۋماقتا تۇراتىن ازاماتتاردىڭ ەسەبىن جۇرگىزۋ ءۇشىن ازىرلەگەنىن ايتا كەتەيىن. تىركەۋدىڭ بۇل نىسانى مىندەتتى ەمەس، تەك كەڭەستىك سيپاتتا جانە ونى ازاماتتار ءوز ەركىمەن تولتىرادى. بۇل رەتتە، كورسەتىلگەن تىركەۋ پاراعى ۋچاسكەلىك ينسپەكتوردىڭ جۇمىس پلانشەتىندە ەلەكتروندى فورماتقا كوشىرىلەتىنىن، تۇرعىندار كەلىسكەن جاعدايدا، اۋىزشا سۇراق-جاۋاپ ارقىلى تىكەلەي پوليسيا قىزمەتكەرى تولتىراتىنىن ناقتىلايمىز»، – دەدى ساتتاروۆ.