وڭىرلىك كوممۋنيكاسيالار قىزمەتىنىڭ الاڭىندا الماتى قالاسى پوليسيا دەپارتامەنتىنىڭ رەسمي وكىلى سالتانات ازىربەكتىڭ قاتىسۋىمەن بريفينگ ءوتتى، دەپ حابارلايدى Almaty-akshamy.kz.
سپيكەر ءتارتىپ ساقشىلارى 2023 جىلدىڭ 10 ايىنا جكو تالداۋىن جۇرگىزگەنىن، سونداي-اق جۇرگىزىلىپ جاتقان پروفيلاكتيكالىق جۇمىستار تۋرالى حابار بەرگەنىن ايتتى.
بيىلعى 10 ايدا الماتىدا 2 مىڭ 991 جكو تىركەلىپ، سونىڭ سالدارىنان 84 ادام كوز جۇملى، تاعى 3 مىڭ 211 ادام جاراقات الدى.
جىل باسىنان بەرى بارلىعى 1 ميلليون 582 مىڭ 980 رەت جول قوزعالىسى ەرەجەلەرى بۇزىلعانى انىقتالدى. كولىك قۇرالىن ماس كۇيىندە باسقارعانى ءۇشىن 1 مىڭ 718 جۇرگىزۋشى ۇستالدى. سوت 2 مىڭ 443 جۇرگىزۋشىنى كولىك قۇرالىن باسقارۋ قۇقىعىنان ايىردى.
ايتا كەتەيىك، الماتىدا جولداعى جاعدايعا دەپارتامەنت پوليسەيلەرى كۇن سايىن تالداۋ جۇرگىزەدى، مەگاپوليستە مەزگىل سايىن جەدەل-پروفيلاكتيكالىق ءىس-شارالار وتكىزىلەدى.
«ءبىزدىڭ قالامىزدا «قورعاۋ – ءقاۋىپتى جۇرگىزۋشى» اۆتوماتتاندىرىلعان جۇيەسى جۇمىس ىستەيدى، ول قوزعالىستىڭ قارسى جولاعىنا شىعاتىنداردى، جالعان نومىرلىك بەلگىلەردى پايدالاناتىن جول قوزعالىسى ەرەجەلەرىن بۇزۋشىلاردى، كولىك قۇرالىن باسقارۋ قۇقىعىنان ايىرىلعان، ءبىراق سوعان قاراماي، كولىك جۇرگىزەتىندەردى انىقتاۋعا مۇمكىندىك بەرەدى. بۇل ءىس - شارالاردىڭ بارلىعى الماتىداعى جول جاعدايىن باقىلاۋعا مۇمكىندىك بەرەدى»، - دەدى سالتانات ازىربەك.
جۋرناليستەردىڭ سۇراقتارىنا جاۋاپ بەرە وتىرىپ، پوليسيا دەپارتامەنتىنىڭ رەسمي وكىلى جول ەرەجەسىن كوبىنە جولدا ءجۇرۋ تاجىريبەسىنە قاراماي، تارتىپكە باعىنبايتىن جۇرگىزۋشىلەر ءجيى بۇزاتىنىن ايتتى.
«ءيا، جاڭادان كولىك ايداپ جۇرگەندەر وتە ساق، ءبىراق ولاردىڭ تاجىريبەسى از. وكىنىشكە وراي، ولار جاعىمسىز جاعدايلارعا تاپ بولادى، اپات جاسايدى، ارينە، اۋىر زارداپتارمەن ەمەس. ايتا كەتۋ كەرەك، ەڭ جاقسى ءقاۋىپسىز جۇرگىزۋشى – تارتىپكە باعىنعان، كاسىبي، جول قوزعالىسى ەرەجەلەرىن قاتاڭ ساقتايتىن، جول قوزعالىسىنىڭ باسقا قاتىسۋشىلارىنا قۇرمەتپەن قارايتىن ادام»، - دەدى س.ازىربەك.
سپيكەر جول قوزعالىسىنىڭ بارلىق قاتىسۋشىلارىن ءوز ىس-ارەكەتتەرىنە جاۋاپ بەرۋگە جانە بالالارعا دۇرىس ۇلگى كورسەتۋگە شاقىردى.
سالتانات ازىربەك ماس جۇرگىزۋشىلەر ماسەلەسىنە دە توقتالدى. ونىڭ حابارلاۋىنشا، جىل باسىنان بەرى الماتى قالاسى پد ساپتىق بولىمشەلەرىنىڭ كۇشىمەن قالا جولدارىندا 1718 ماس جۇرگىزۋشى ۇستالعان. مۇنداي بۇزۋشىلىق ءۇشىن 7 جىلعا دەيىن جۇرگىزۋشى كۋالىگىنەن ايىرۋ ءقاۋپى بار.