الماتى پوليسەيلەرى ەكى ۇرلىقتىڭ بەتىن اشتى

الماتى قالاسى جەتىسۋ اۋدانىنىڭ پوليسەيلەرى ەكى ۇرلىقتىڭ بەتىن اشتى، دەپ حابارلايدى Almaty-akshamy.kz.

«قىلمىستىڭ ءبىرى جۇمابايەۆ كوشەسىندە ورنالاسقان كولىك جۋۋ ورنىندا جاسالعان. جابىرلەنۋشى كولىگىن كولىكجۋۋعا قالدىرىپ كەتكەنىن، ونى قايتا العان كەزدە 160 مىڭ تەڭگەنىڭ جوعالعانىن انىقتاعانىن ايتتى. بوتەننىڭ مۇلكىن ۇرلادى دەگەن كۇدىكپەن 2000 جىلى تۋعان يا.ەسىمدى ازامات ۇستالدى. رايىمبەك داڭعىلى بويىنداعى ازىق-تۇلىك دۇكەنىندە تاعى ءبىر مۇلىكتىك قىلمىس بولدى. ساۋدا مەكەمەسىنىڭ اكىمشىلىگى تۇرمىستىق زاتتاردىڭ سانىنا جەتپەي، پوليسياعا حابارلاسقان. انىقتالعانداي، دۇكەن سورەلەرىنەن 2001 جىلى تۋعان ا.ەسىمدى ازامات ۇرلىق جاساپ جۇرگەن. ايتپاقشى، ول بۇعان دەيىن دە وسىعان ۇقساس قىلمىستى جاساعانى ءۇشىن قىلمىستىق جاۋاپكەرشىلىككە تارتىلعان. ول دا ۇستالدى»، – دەدى جەتىسۋ اۋداندىق پوليسيا باسقارماسىنىڭ باستىعى جانىبەك شىناسىلوۆ.

ەكى جاعدايدا دا ۇرلىق ارەكەتتەرى بەينەباقىلاۋ كامەرالارىنا ءتۇسىپ قالعان. تەرگەۋشىلەر ءقازىر كۇدىكتىلەردىڭ وسىعان ۇقساس باسقا دا ىقتيمال قىلمىستارعا قاتىسى بار-جوعىن انىقتاپ جاتىر.

ق ر قك-نىڭ 201-بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى. ق ر كونستيتۋسياسىنىڭ 77-بابى 3ء-بولىمى 1-تارماعى، ق ر قك-نىڭ 19-بابى 1-تارماعىنا ساي كەز كەلگەن ازامات سوت شەشىمى زاڭدى كۇشىنە ەنگەنگە دەيىن كىناسىز دەپ سانالادى.