تۇركيا، ءازىربايجان، قىرعىزستان، وزبەكستان، تۇرىكمەنستان جانە قازاقستان مۋزەيلەرى اراسىندا تۇركى مادەنيەتىنىڭ حالىقارالىق ۇيىمى تۇركسوي ۇزدىكتەردى انىقتادى. الماتى قالاسى مۋزەيلەر بىرلەستىگى «Best Museum of the Turkic World» جوعارى ماراپاتقا يە بولدى. بۇعان مۋزەيتانۋشىلاردىڭ ەلىمىزبەن بىرگە شەتەلدە ۇلتتىق قۇندىلىقتار مەن تاريحي-مادەني مۇرانى ناسيحاتتاۋ جونىندەگى وراسان زور جۇمىستاردىڭ ارقاسىندا قول جەتىپ وتىر. بۇل سەرتيفيكاتتى تۇركسوي حالىقارالىق ۇيىمىنىڭ باس حاتشىسى سۇلتان رايەۆ تابىستادى، دەپ حابارلايدى aqshamnews.kz
«الماتى مۋزەيلەرى سوڭعى ەكى جىلدىڭ وزىندە ۇلكەن جۇمىس اتقارعانىن كورىپ وتىرمىز. تۇركى ەلدەرىنىڭ عانا ەمەس، ەۋروپا مەن ازيانىڭ تۇرعىندارى ءقازىر الماتى قالاسى ۇيىمداستىرعان بىرەگەي كورمەلەردى كورە الادى. مىسالى، ستامبۋل، سەۋل، پراگا، نەاپول، ۆەنا جانە الەمنىڭ باسقا قالالارىندا قازاقستان كوشپەندىلەرى تۋرالى كوشپەلى كورمەلەر وتكىزىلدى. ونەر مەن تاريحقا اۋەستەنۋشىلەر سىزدەر ۇسىنعان جادىگەرلەر مەن ارتەفاكتىلەرگە تاڭ قالىستى. وسىلايشا، سىزدەر قازاق مادەنيەتىن شەتەلدە بەلسەندى تۇردە ناسيحاتتاپ، ەلىڭىزگە تۋريستەردى تارتاسىز جانە تۇركى الەمىندەگى مۋزەيدى زەرتتەۋ سالاسىنداعى قىزمەتتى دامىتىپ كەلەسىزدەر. قالا بيلىگى سالا وكىلدەرىنە بۇرىن-سوڭدى بولماعان قولداۋ كورسەتىپ جاتقانىن كورىپ وتىرمىز»، - دەدى سۇلتان رايەۆ ماراپاتتاۋ بارىسىندا.
ايتا كەتەيىك، الماتى قالاسى مۋزەيلەر بىرلەستىگىنىڭ قۇرامىنا حالىق ىقىلاس اتىنداعى حالىق مۋزىكالىق اسپاپتار مۋزەيى، احمەت بايتۇرسىن ۇلىنىڭ مۋزەي ءۇيى، س.مۇقانوۆ پەن ع.مۇسىرەپوۆتىڭ ادەبي-مەموريالدىق مۋزەي كەشەنى، ن. تىلەندييەۆتىڭ مەموريالدىق مۋزەيى، مۋلتيمەديالىق ءداستۇرلى مۋزىكا ورتالىعى، د.ا.قونايەۆ مۋزەيى، رايىمبەك باتىر مۋزەي كەشەنى، سونداي-اق الماتى قالاسىنىڭ تاريحىنىڭ مۋزەيى كىرەدى. مەكتەپ جاسىنداعى بالالارعا مۋزەيگە كىرۋ تەگىن. مۇنداي شەشىمدى الماتى قالاسىنىڭ اكىمى ەربولات دوسايەۆ قابىلداعان.
سونىمەن قاتار، الماتى مۋزەيتانۋشىلارى اكىمدىكتىڭ قولداۋىمەن پاريجدە (لۋۆر)، سەۋلدە، ستامبۋلدا، نەاپولدە، ۆەنادا، سامارقاندتا، باكۋدە، اشحابادتا جانە پراگادا تاعىلىمدامادان جانە وقۋدان ءوتتى. 7 حالىقارالىق كورمە ۇيىمداستىرىپ، سەرىكتەستىك تۋرالى 15 حالىقارالىق مەموراندۋمعا قول قويدى.