الماتى پوليسەيلەرى التىن بۇيىمدارىن ۇرلاعان كۇدىكتىنى ۇستادى

ۋ. ەسىمدى ازامات ۋاقىتشا ۇستاۋ يزولياتورىنا قامالدى.

الماتى پوليسەيلەرى پاتەر ۇرىسىن ۇستادى. ول التىن بۇيىمداردى ۇرلاپ، ءۇي يەسىنە 200 مىڭ تەڭگەدەن استام ماتەريالدىق زالال كەلتىرگەن، دەپ حابارلايدى Almaty-akshamy.kz.

ىشكى ىستەر مينيسترلىگىنىڭ رەسمي سايتىنداعى مالىمەت بويىنشا، بۇرىن سوتتى بولعان 1973 جىلى تۋعان ۋ. ەسىمدى ازاماتتى وتكەن كۇنى گاگارين كوشەسىندەگى ۇيلەردىڭ ءبىرىنىڭ اۋلاسىندا جەدەل قىزمەتكەرلەر ۇستاعان. 

«ۇستاۋعا بىرنەشە مينۋت قالعاندا سوتتالۋشى الماتىلىق قىزدىڭ پاتەرىن توناپ كەتكەن. سول جەردەن التىن بۇيىمداردى ۇرلاپ، ءۇي يەسىنە 200 مىڭ تەڭگەدەن استام ماتەريالدىق زالال كەلتىرگەن ول كىرە بەرىستەن شىعا بەرگەندە قۇرىقتالدى. كۇدىكتىدەن تابىلعان "ولجا" پروسەسسۋالدىق تارتىپپەن تاركىلەندى. سونىمەن قاتار، جەدەل تەرگەۋ توبى كۇدىكتىنى تەكسەرۋ كەزىندە تابىلعان پنيەۆماتيكالىق تاپانشانى دا قىلمىستىق ءىس ماتەريالدارىنا تىركەدى. ۋ. ەسىمدى ازامات ۋاقىتشا ۇستاۋ يزولياتورىنا قامالدى»، – دەپ مالىمدەدى الماتى قالاسى پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.

مامانداردىڭ ايتۋىنشا، ءقازىردىڭ وزىندە پوليسەيلەردە ۇستالعان ادامنىڭ وسىنداي ءۇش ۇرلىققا قاتىسى بار ەكەندىگىنە سەنىمدى دەرەكتەر بار. سوتقا دەيىنگى تەرگەۋ اياقتالعانعا دەيىن جەڭىل اقشاعا اۋەسقويدىڭ «قىزمەتتىك ءتىزىمى» تولىقتىرىلۋى مۇمكىن.