بۇل قايىرىمدىلىق اكسياسىنا قالاداعى 18 كومپانيا اتسالىستى.
الماتى اسسامبلەياسى مەن بيزنەس وكىلدەرى پەتروپاۆلعا گۋمانيتارلىق كومەك جىبەردى، دەپ حابارلايدى Almaty-akshamy.kz
قازاقستان حالقىنىڭ بىرلىگى كۇنى الماتىنىڭ ەتنومادەني بىرلەستىكتەرى مەرەكەنى تويلاپ قانا قويماي، ايتۋلى كۇنى يگى ىسكە اتسالىستى. الماتى قحا گۋمانيتارلىق كومەكتى جيناۋ جونىندەگى شتابىنىڭ باستاماسىمەن تابيعي اپاتتان زارداپ شەككەندەرگە 25 توننا گۋمكومەك جينالدى. يگى ىسكە رەسپۋبليكالىق جانە قالالىق ەتنومادەني بىرلەستىكتەر قاتىستى. قاجەتتى جابدىقتار سالىنعان جۇك كولىگى پەتروپاۆل قالاسىنا بەت الدى. وعان ازىق-تۇلىك، بالالار مەن ەرەسەكتەرگە ارنالعان جىلى كيىم، اياق كيىم، توسەك-ورىن، دارى-دارمەكتەر، ماتراستار مەن جاستىقتار، قۇرىلىس ماتەريالدارى كىردى.
الماتىلىق بيزنەس وكىلدەرى پەتروپاۆلعا 20 توننا گۋمانتارلىق كومەك جىبەردى. قايىرىمدىلىق اكسياسىنا مەگاپوليستىڭ 18 كومپانياسى قاتىستى. جونەلتىلگەن جۇكتىڭ ىشىندە شاتىرلار، شامدار، جاڭبىرعا ارنالعان جامىلعىلار، ارنايى كيىمدەر مەن اياق كيىمدەر، كۇرەكتەر، اۋىز سۋ جانە وزگە دە قاجەتتى زاتتار بار.