الماتى ورتالىعىندا جەزوكشەلىكپەن اينالىسۋعا ارنالعان ەكى ءۇي انىقتالدى

الماتى پوليسياسى كافە، بار مەن تۇنگى كلۋبتاردى تەكسەردى.

جەرگىلىكتى ءىس-شارا نەگىزىنەن ويىن-ساۋىق مەكەمەلەرىندە جۇرگىزىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«سونداي-اق تەكسەرۋ بىردەن بىرنەشە باعىتتا: كالياندى پايدالانۋ، كامەلەتكە تولماعانداردىڭ تۇنگى ۋاقىتتا ويىن-ساۋىق مەكەمەلەرى مەن كومپيۋتەرلىك كلۋبتاردا بولۋى، ساعات 23.00-دەن كەيىن الكوگول ونىمدەرىن ساتۋ بويىنشا جۇرگىزىلدى. بۇل شارا، ەڭ الدىمەن، قوعامدىق ءتارتىپتى بۇزۋ دەرەكتەرىنىڭ جولىن كەسۋگە جانە قۇقىقبۇزۋشىلىقتىڭ الدىن الۋعا باعىتتالعان. ەگەر ناقتى اقپاراتقا جۇگىنەر بولساق، المالى اۋدانىنداعى 10 مەكەمەدە كاليان قولدانۋدىڭ 38 دەرەگى انىقتالسا، كامەلەتكە تولماعانداردىڭ تۇنگى ۋاقىتتا ويىن-ساۋىق ورىندارىندا بولۋىنىڭ 27 دەرەگى تىركەلدى. ال مەدەۋ اۋدانىندا كاليان قولدانۋدىڭ 43 دەرەگى تىركەلدى»، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى ەرجان ۇزابايەۆ.

سونىمەن قاتار شاھاردىڭ ورتالىعىندا جەزوكشەلىكپەن اينالىسۋعا ارنالعان ەكى ءۇي انىقتالدى. ول جەردە 7 جەڭىل ءجۇرىستى ايەل جۇمىس ىستەگەن.