بىلتىردان بەرى تولىققاندى جۇزەگە اسىرىلا باستاعان «ادال ازامات» باعدارلاماسىنىڭ نەگىزىندە قالاداعى №59 مەكتەپ-گيمنازياسىندا «ادال ادام – ادال ەڭبەك – ادال تابىس» تاقىرىبىندا قۇندىلىققا نەگىزدەلگەن تاسىلدەر ايلىعى ۇيىمداستىرىلدى.
ايلىق جوسپارى بويىنشا مەكتەپتىڭ بارلىق بىرلەستىگى ءۇش كەزەڭگە ءبولىنىپ، ءار كەزەڭدە ءارتۇرلى جوبالار ىسكە اسىرىلدى. ولار ادىلدىك، جاۋاپكەرشىلىك، زاڭ جانە ءتارتىپ، بىرلىك جانە ىنتىماق، ەڭبەكقورلىق جانە كاسىبي بىلىكتىلىك، جاسامپازدىق جانە جاڭاشىلدىق سياقتى قۇندىلىقتاردى دامىتۋعا باعىتتالدى.
قازاق ءتىلى مەن ادەبيەتى پاندەر بىرلەستىگى تاۋەلسىزدىك جانە وتانشىلدىق قۇندىلىقتارىن جۇزەگە اسىرۋ ماقساتىندا ءبىرقاتار تاربيەلىك ءىس-شارا وتكىزدى. ماسەلەن، «بالالار كىتاپحاناسى» جوباسى اياسىندا 5-سىنىپ وقۋشىلارى «ەر توستىك – ەل قورعاعان ەر» تاقىرىبىندا كوركەم وقۋ مەن تەاترلاندىرىلعان قويىلىم ۇسىندى. بۇل قويىلىم ارقىلى جەتكىنشەكتەر ادەبي كەيىپكەرلەردى تانىپ، ەل قورعاۋ مەن ادالدىق ۇعىمدارىن تەرەڭىرەك ۇعىندى.
جوعارى سىنىپ وقۋشىلارى تاۋەلسىزدىك تاقىرىبىنداعى شىعارمالار بويىنشا بۋكترەيلەر جاساپ، شىعارماشىلىق قابىلەتىن كورسەتتى. سونىمەن قاتار، «تاۋەلسىزدىك جىلدارىنداعى شىعارمالارداعى ادالدىق تاقىرىبى» اتتى جاس جازۋشىلارمەن كەزدەسۋ ۇيىمداستىرىلدى. بۇل وقۋشىلاردىڭ ادەبيەتكە دەگەن قىزىعۋشىلىعىن ارتتىرىپ، ەركىن وي الماسۋعا مۇمكىندىك بەردى.
«ايلىق اياسىندا «قۇندىلىق باستاۋى – حالىق اۋىز ادەبيەتى» اتتى كوميكستەر كورمەسى دە ۇيىمداستىرىلىپ، ۇلتتىق مۇرا زاماناۋي فورماتتا ۇسىنىلدى. ماحامبەت وتەمىس ۇلى شىعارمالارى بويىنشا وتكەن كۋيز باتل وقۋشىلاردىڭ ءبىلىمىن شىڭداپ، رۋحىن كوتەردى. كىتاپ كورمەسى ارقىلى جاس ۇرپاقتىڭ كىتاپقا دەگەن قىزىعۋشىلىعىن ارتتىرۋعا باعىتتالعان ءىس-شارالار دا ءساتتى ۇيىمداستىرىلدى. مۇنداي تاعىلىمدى جوبالار جاس ۇرپاقتى سانالى، جاۋاپكەرشىلىگى جوعارى تۇلعا رەتىندە تاربيەلەۋدىڭ ماڭىزدى قادامى ەكەنى ءسوزسىز»، – دەيدى №59 مەكتەپ-گيمنازياسى ديرەكتورىنىڭ وقۋ ءىسى جونىندەگى ورىنباسارى كامشات ەگەۋبايەۆا.
