راقىمشىلىق جاساۋ زاڭى اياسىندا 8،6 مىڭ ادامنىڭ جازا مەرزىمى قىسقارتىلدى، دەپ حابارلايدى aqshamnews.kz
جوعارعى سوت ءتوراعاسى اسلامبەك مەرعالييەۆ 2025 جىلى سوت تورەلىگىن جۇزەگە اسىرۋ قورىتىندىلارىنا ارنالعان جوعارى سوت ورگانىنىڭ كەڭەيتىلگەن كەڭەسىن وتكىزدى.
كەڭەس جۇمىسىنا پرەزيدەنتتىڭ قۇقىقتىق ماسەلەلەر جونىندەگى كومەكشىسى ەرجان جيەنبايەۆ، جوعارى سوت كەڭەسىنىڭ ءتوراعاسى دميتريي مالاحوۆ، جوعارعى سوتتىڭ سوت القالارى مەن سوت اكىمشىلىگىنىڭ، كاسساسيالىق، وبلىستىق جانە ولارعا تەڭەستىرىلگەن سوتتاردىڭ باسشىلىعى، سونداي-اق رەسپۋبليكا سۋديالارى بەينەبايلانىس فورماتىندا قاتىستى. كەڭەستە جوعارعى سوتتىڭ سوت القالارىنىڭ ءتوراعالارى نۇرسەرىك ءشارىپوۆ، نازگۇل راحمەتۋللينا، اسلان تۇكييەۆ، سونداي-اق سوت اكىمشىلىگىنىڭ باسشىسى نايل احمەتزاكيروۆ بايانداما جاسادى.
جوعارعى سوت ءتوراعاسى ءوتىپ بارا جاتقان جىلدىڭ باستى وقيعاسى رەتىندە پرەزيدەنتتىڭ تاپسىرماسىمەن دەربەس كاسساسيالىق ساتىنىڭ قۇرىلعانىن اتاپ ءوتتى.
جۇمىستىڭ العاشقى بەس ايىندا كاسساسيالىق سوتتار 14 مىڭنان استام شاعىم مەن نارازىلىقتى تىركەگەن. ال جىلدىڭ ءبىرىنشى جارتىجىلدىعىندا جوعارعى سوتقا 9،7 مىڭ كاسساسيالىق ءوتىنىشحات كەلىپ تۇسكەن.
وتىنىشتەر سانىنىڭ 45%-عا ءوسۋى كاسساسيالىق قايتا قاراۋدىڭ جاڭا مودەلىنە جوعارى سەنىم بار ەكەنىن جانە ونىڭ پراكتيكالىق ماڭىزىن ايقىندايدى.
بيىل سوت اكتىلەرىن تۇزەتۋ ۇلەسى ەداۋىر ارتقان. ماسەلەن، ازاماتتىق ىستەر بويىنشا – 3%-دان 18،5%-عا دەيىن، قىلمىستىق ىستەر بويىنشا – 8%-دان 29%-عا دەيىن ءوستى.
اكىمشىلىك ىستەر بويىنشا قايتا قاراۋ كورسەتكىشى تۇراقتى كورسەتكىشتى ساقتاپ قالعان. (17%-دان 15،5 %-عا تومەندەدى).
جيىندا كاسساسيالىق ساتىنىڭ ازاماتتار مەن زاڭدى تۇلعالاردىڭ قۇقىقتارىن قورعاۋ جونىندەگى كونستيتۋسيالىق كەپىلدىكتەردى ىسكە اسىرۋداعى شەشۋشى ءرولى دە اتاپ ءوتىلدى.
اسلامبەك مەرعالييەۆ تالاپ قويۋلار مەن ماتەريالدار سانىنىڭ – 27%-عا 1،3 ملن-نان 1،6 ملن-عا دەيىن ارتقانىن اتاپ ءوتتى.
اياقتالعان ىستەر سانىنىڭ كوبەيۋى جانە تالاپ قويۋدىڭ كوڭىل كونشىتەرلىك دەڭگەيىنىڭ جوعارى بولۋى سوت جۇيەسىنىڭ سۇرانىسقا يە ەكەنىن جانە داۋلاردىڭ ۋاقتىلى شەشىلەتىنىن كورسەتىپ وتىر.
"قارالعان 276 مىڭ مەديابەلدى ءىستىڭ 46،3 پايىزى بالامالى تاسىلدەرمەن رەتتەلدى. 266 مىڭنان استام ءىس جەڭىلدەتىلگەن تارتىپپەن قارالدى. قىلمىستىق سوت ءىسىن جۇرگىزۋدە جەكە ايىپتاۋ ىستەرىن ەسەپكە الماعاندا، اقتاۋ ۇكىمدەرىنىڭ سانى 30%-عا (109-دان 142-گە دەيىن) ارتتى. باس بوستاندىعىنان ايىرۋمەن بايلانىستى ەمەس جازالاردى قولدانۋ، سونىڭ ىشىندە تۇزەۋ جانە قوعامدىق جۇمىستار، شارتتى سوتتاۋ كەڭىنەن قولدانىلدى. راقىمشىلىق جاساۋ اياسىندا 338 ادام جازادان بوساتىلدى، 5 مىڭنان استام سوتتالعانعا قاتىستى جازا قولدانىلمادى، 8،6 مىڭ ادامنىڭ جازا مەرزىمى قىسقارتىلدى"، – دەلىنگەن جوعارعى سوتتىڭ باسپا ءسوز قىزمەتى تاراتقان حابارلامادا.
قاماۋدا ۇستاۋعا سانكسيا بەرۋ تۋرالى ءوتىنىشحاتتاردىڭ ۇلەسى دە ازايعان. 2025 جىلى مۇنداي ءوتىنىشحاتتاردىڭ 62،5%-ى قولداۋ تاپتى (2024 جىلى –74،5% بولعان).
سونىمەن قاتار ءۇيقاماق تۇرىندەگى بۇلتارتپاۋ شاراسىن قولدانۋ 81 پايىزعا ارتقان. ەلەكتروندىق بىلەزىكتەر 2 110 ادامعا قولدانىلدى (2024 جىلى – 954).
جازانىڭ وتەلمەگەن بولىگىن نەعۇرلىم جەڭىل جازا تۇرىنە اۋىستىرۋ تۋرالى ءوتىنىشحاتتاردى قابىلداۋ – 30،9%-دان 38،9%-عا، شارتتى تۇردە مەرزىمىنەن بۇرىن بوساتۋ بويىنشا – 52،9%-دان 53،9%-عا وسكەن.
اكىمشىلىك تالاپ قويۋلاردىڭ جالپى سانى ارتقانىمەن (30 مىڭنان 32 مىڭعا دەيىن)، داۋلاردىڭ جەكەلەگەن ساناتتارى بويىنشا مەملەكەتتىك ساتىپ الۋلار، باسەكەلەستىكتى قورعاۋ جانە وزگە دە سالالارداعى زاڭناماعا ەنگىزىلگەن وزگەرىستەرگە بايلانىستى ولاردىڭ ازايۋى بايقالادى.