الماتى ونكولوگيالىق ورتالىعىنىڭ ديرەكتورى نۇرسۇلتان ىزباعامبەتوۆ ءوڭىر تۇرعىندارىنا ونكولوگيالىق كومەك جانە مەكەمەنىڭ وتكەن جىلعى جۇمىسى تۋرالى ايتىپ بەردى.
وڭىرلىك كوممۋنيكاسيالار قىزمەتىنىڭ الاڭىندا قانداي قاتەرلى اۋرۋلار كوش باستاپ تۇرعانى جانە ناۋقاستاردى ەمدەۋ تۋرالى تالقىلاندى، دەپ حابارلايدى Almaty-akshamy.kz.
2023 جىلدىڭ قورىتىندىسى بويىنشا الماتى قالاسىندا 5491 پاسيەنت انىقتالىپ، ەسەپكە قويىلدى.
قاتەرلى ىسىك دەرتىنە شالدىققاندار قۇرىلىمى وتكەن جىلمەن سالىستىرعاندا وزگەرىسسىز قالدى:
- ءبىرىنشى ورىندا - ءسۇت بەزى وبىرى 14،5% (794 جاعداي)؛
- ەكىنشىسىندە - كولورەكتالدى قاتەرلى ىسىك 8،9% (489 جاعداي)،
- ۇشىنشىسىندە - وكپەنىڭ قاتەرلى ىسىگى 6،0% (332 جاعداي)،
- تورتىنشىدەن - قۋىقاستى بەزىنىڭ قاتەرلى ىسىگى 5،2% (288 جاعداي).
ونكولوگيالىق ورتالىق تۋرالى ەسەپتە 31866 ونكولوگيالىق پاسيەنت تۇر (2022ج. – 29439)، ءوسىم 8،2% -. قۇرادى.
«سىرقاتتانۋشىلىقتىڭ ءوسۋىن تالداۋ ونكولوگيالىق ناۋقاستاردىڭ ەلەكتروندىق تىركەلىمىنە (ونەت) ەسەپكە قويىلعان جالپى سانىنىڭ ىشىنەن ءىس جۇزىندە ءاربىر 6 پاسيەنت الماتى ونكولوگيالىق ورتالىعىنا جوعارى ساپالى مەديسينالىق كومەك الۋ ءۇشىن الماتىعا باسقا وڭىرلەردەن قايتا تىركەۋ ارقىلى كەلگەنىن كورسەتتى»،-دەپ ءتۇسىندىردى نۇرسۇلتان ىزباعامبەتوۆ.
2023 جىلدىڭ قورىتىندىسى بويىنشا ەسەپكە الىنعان 5491 پاسيەنتتىڭ 16،2% - ى (890 پاسيەنت) الماتى قالاسىنا باسقا وڭىرلەردەن كەلىپ تىركەلدى. باسقا ايماقتاردان تىركەلگەن 890 پاسيەنتتىڭ 125-ىندە (14،0%) اۋرۋ اسقىنعان كەزەڭدە انىقتالعان.
ناۋقاستاردىڭ كوبى الماتى (364) جانە جامبىل (103) وبلىستارىنان كەلگەن.
ستاتيستيكانى كەلتىرە وتىرىپ، ونكولوگيالىق ورتالىقتىڭ ديرەكتورى قاتەرلى ىسىكتەردەن بولاتىن ءولىم - ءجىتىم ءۇش جىلدا-12،4% تومەندەگەنىن اتاپ ءوتتى.
مەديسينا قىزمەتكەرلەرىنىڭ جۇمىسىنىڭ باستى ماقساتتارىنىڭ ءبىرى - حالىقتىڭ نىسانالى توپتارىنا سكرينينگتىك تەكسەرۋلەر جۇرگىزە وتىرىپ، قاتەرلى ىسىكتى ەرتە ساتىسىندا جىلدام انىقتاۋ.
ءسۇت بەزى وبىرىن ەرتە انىقتاۋعا سكرينينگتىڭ 1 كەزەڭىن جۇرگىزۋ ءۇشىن الماتى قالاسىندا 37 مامموگراف جۇمىس ىستەيدى.
«قاتەرلى ىسىكتى ەرتە انىقتاۋ ماقساتىندا رەسپۋبليكادا جاتىر موينى وبىرى، ءسۇت بەزى وبىرى جانە توق ىشەك وبىرى بويىنشا سكرينينگتىك باعدارلامالار جۇمىس ىستەيدى. 2023 جىلدىڭ قورىتىندىسى بويىنشا سكرينينگ كەزىندە قاتەرلى ىسىكتىڭ 298 جاعدايى انىقتالدى. بارلىق پاسيەنتتەر مامانداندىرىلعان ەمدەۋمەن قامتىلعان»، - دەپ جالعاستىردى نۇرسۇلتان ىزباعامبەتوۆ.
وتكەن جىلى الماتىنىڭ ونكولوگيالىق ورتالىعىندا 22576 ناۋقاس ەمدەلدى. حيرۋرگيالىق بولىمشەلەردە 2681 حيرۋرگيالىق وتا جاسالدى. بۇل رەتتە وپەراسيالاردىڭ 55% - ى از ءينۆازيۆتى ادىستەرمەن جۇرگىزىلەدى.
بۇگىنگى تاڭدا ونكولوگيالىق ورتالىقتىڭ ارسەنالىندا حيميوتەراپيانىڭ 50-گە جۋىق ءتۇرى، 40-تان استام ماقساتتى جانە گورمونالدى پرەپاراتتار قولدانىلادى، سونىڭ ارقاسىندا 18790 پاسيەنت حيميوتەراپيالىق ەم الدى.
ونكولوگيالىق ناۋقاستاردى ەمدەۋ ءۇشىن الماتى ونكولوگيالىق ورتالىعىندا ساۋلەلىك تەراپيا بەلسەندى قولدانىلادى. ەسەپتى كەزەڭدە راديولوگيالىق بولىمشەدە 1064 ونكولوگيالىق ناۋقاسقا 18853 سەانس وتكىزىلدى.
امبۋلاتوريالىق حيميوتەراپيا كابينەتىنىڭ جاعدايىندا 2023 جىلى 10498 پاسيەنت ەم الدى.
وتكەن جىلى قاتەرلى ىسىككە شالدىعۋ ءقاۋپى بار جانە ونكولوگيالىق ناۋقاستارعا (كت جانە مرت، ۋلترادىبىستىق، ەندوسكوپيالىق، سيتولوگيالىق، يممۋندىق-گيستوحيميالىق جانە كلينيكالىق-دياگنوستيكالىق زەرتتەۋلەر) 640 مىڭنان استام دياگنوستيكالىق زەرتتەۋلەر جۇرگىزىلدى.