وركەنيەتتەن شەت قالدىق دەگەن الماتى وبلىسىنداعى كوكتوعان ەلدىمەكەنىنىڭ جۇرتى اكىمدىك وكىلىن قۇرداي جورعالاتتى. سەبەبى اۋىلدا بۇعان دەيىن دە بىرنەشە مارتە كوتەرىلگەن ماسەلە ءالى كۇنگە دەيىن شەشىمىن تاپپاي كەلەدى. اۋىز سۋدىڭ تاپشىلىعىنان حالىق مال ىشكەن قۇدىققا بارۋعا ءماجبۇر، دەپ حابارلايدى Almaty-akshamy.kz Almaty.tv-گە سىلتەمە جاساپ.
سۋ الاتىن قۇبىردىڭ قاسى قوقىس، ماڭىندا قاڭعىعان يتتەر دە جۇرەدى. تىرشىلىك كوزىن ىزدەگەن جۇرتتىڭ باسقا امالى جوق.
«ورتالىقتا ءبىر-اق كولونكا. ءبىز جاقتا سۋ جوق. ءوزىمىز قازدىردىق، ءبىراق ول سۋدى ىشۋگە مۇمكىن ەمەس»، – دەدى كوكتوعان اۋىلىنىڭ تۇرعىنى ءسانيا سۋانبەكوۆا.
اۋىلدىڭ تاعى ءبىر وزەكتى ماسەلەسى – توزىعى جەتكەن مىنا ءبىر ەلەكتر باعاندارى. وتكەن عاسىردا قاعىلعان قازىقتار بۇگىندە قۇلايىن دەپ تۇر. تۇرعىنداردىڭ ايتۋىنشا، كەيدە ەلەكتر سىمدارى ءۇزىلىپ، اۋا-رايى وزگەرسە بولدى، ەلدىمەكەن جارىقسىز وتىرادى.
«جەل بولعاندا، جارىق جوق، ءوشىپ قالادى. توڭازىتقىش ىستەمەي قالادى»، – دەدى كوكتوعان اۋىلىنىڭ تۇرعىنى سادىق بايمۇحانبەتوۆ.
تۇرعىنداردىڭ ايتۋىنشا، الەۋمەتتىك جەلى بىلاي تۇرسىن، كەيدە تەلەفونمەن تىلدەسۋ قيىن.
«جەدەل جاردەم شاقىرساق، جولعا شىعادى. ءبىراق تابا الماي، ساندالىپ جۇرەدى. نەگە؟ سەبەبى بىزدە ينتەرنەت اتىمەن جوق. جولدى تۇسىندىرەيىن دەسەك، قوڭىراۋ شالۋدىڭ ءوزى مۇمكىن ەمەس»، – دەدى كوكتوعان اۋىلىنىڭ تۇرعىنى ۆالەنتينا مارتيانوۆا.
اكىمدىك وكىلى اۋىلداعى ماسەلەنىڭ ءبارىن بىرتىندەپ شەشۋگە تىرىسىپ جاتقانىن ايتىپ اقتالدى. «اۋىلداعى بارلىق كەم-كەتىكتەن حابارىمىز بار. بالالاردى مەكتەپكە تاسۋ، جولدى جوندەۋ، جارىق جۇرگىزۋ، سۋ تارتۋ سىندى ماسەلە ءماسليحاتتا قارالىپ جاتىر. قارجى بولىنسە، شەشىلەدى»، – دەدى ەلتاي اۋىلدىق وكرۋگى اكىمىنىڭ ورىنباسارى ءبىرجان بەلعوجايەۆ.
اكىمدىك وكىلىنىڭ سوزىنە سەنسەك، كەلەسى جىلى اۋىلدى جارىقپەن قامتۋ جۇمىسى باستالماق. ءتىپتى، جوباسى دا دايىن ەكەن. ال ازىرگە جۇرت دالادا جاتقان قۇبىردان سۋ ءىشىپ، ينتەرنەتسىز بىر-بىرىنە حات جولداپ، امالداي تۇرۋعا ءماجبۇر.