قازاقستان رەسپۋبليكاسى ىشكى ىستەر مينيسترلىگىنىڭ كيبەرقىلمىسقا، ونىڭ ىشىندە ينتەرنەت-الاياقتىققا قارسى ءىس-قيمىل جونىندەگى باعدارلاماسى شەڭبەرىندە الماتى وبلىسى پوليسيا دەپارتامەنتىنىڭ كريمينالدىق پوليسيا باسقارماسى جىل باسىنان بەرى ايتارلىقتاي ناتيجەلەرگە قول جەتكىزدى.
جەدەل-ىزدەستىرۋ ءىس-شارالارى بارىسىندا ءتۇرلى سيپاتتاعى 46 قىلمىستىق ىسكە قاتىسى بار 74 كۇدىكتى انىقتالدى، دەپ حابارلايدى aqshamnews.kz Pوlisia.kz-كە سىلتەمە جاساپ.
جۇمىس قورىتىندىسى بويىنشا 117 قىلمىستىق ءىس اياقتالىپ، سوتقا جولداندى، بۇل ينتەرنەت-قىلمىسكەرلەرمەن كۇرەسكە بايىپتى كوزقاراستى ايعاقتايدى.
– وپەراسيا بارىسىندا اقشا قاراجاتتارىنىڭ زاڭسىز اينالىمىمەن اينالىسقان 62 تۇلعا ۇستالدى. كيبەركەڭىستىكتىڭ تۇراقتى مونيتورينگى ناتيجەسىندە الاياقتىق ارەكەتتەر جۇزەگە اسىرىلعان 177 جالعان ينتەرنەت-سايتتاردى بۇعاتتاۋعا مۇمكىندىك تۋدى. سونداي-اق، كيبەرقىلمىسقا كۇدىكتى 56 ادامنىڭ شوتتارى جابىلىپ، زارداپ شەككەندەرگە 36 ملن 462 مىڭ تەڭگە سوماداعى اقشالاي قاراجات قايتارىلدى، – دەپ تۇيىندەدى الماتى وبلىسى پد كپب باستىعىنىڭ ورىنباسارى نۇرجان كەڭەسحان ۇلى.
كريمينالدىق پوليسيا باسقارماسى ينتەرنەت-الاياقتىق سالاسىنداعى قىلمىستاردىڭ الدىن الۋ جانە اشۋ بويىنشا بەلسەندى جۇمىسىن جالعاستىرۋدا. وبلىس تۇرعىندارى مەن قوناقتارىنا ونلاين-ساتىپ الۋلار مەن قارجىلىق وپەراسيالاردى جۇزەگە اسىرۋ كەزىندە قىراعىلىق تانىتۋعا، ال كۇدىك تۋىنداعان جاعدايدا دەرەۋ قۇقىق قورعاۋ ورگاندارىنا جۇگىنۋگە كەڭەس بەرەدى.