وڭتۇستىك كورەيادا چەدجۋدو ارالىندا الەمدىك ساياساتكەرلەردىڭ حالىقارالىق فورۋمى ءوتتى.
لوندون، نيۋ-يورك، ارگەنتينا، كاليفورنيا، سەربيا، كانادا، ۆاشينگتون، ماسكەۋ جانە باسقا دا قالالاردان كەلگەن ساياساتكەرلەر ءبىر الاڭعا جينالدى. القالى جيىندا سەناتورلار، مەرلەر، دەپۋتاتتار، ءار ءتۇرلى ەلدەردىڭ پارلامەنت جانىنداعى كەڭەس ءتوراعالارى زاڭ سالاسىنداعى تاجىريبەلەرىمەن ءبولىسىپ، باياندامالار وقىدى، دەپ حابارلايدى Almaty-akshamy.kz جەتىسۋ مەدياعا سىلتەمە جاساپ.
قازاقستاننىڭ اتىنان الماتى وبلىستىق ءماسليحاتىنىڭ VII شاقىرىلىمىنىڭ دەپۋتاتى دامير ديگاي قاتىستى.
«العاش رەت وسىنداي اۋقىمدى حالىقارالىق دەڭگەيدە اعىلشىن تىلىندە سويلەدىم. بۇل فورۋمعا ۇياتقا قالماۋ ءۇشىن تىڭعىلىقتى دايىندالدىم. ءبىزدىڭ ساياسي جۇيەمىزدى تانىستىردىم. Nur Otan پارتياسىنىڭ «Primaries» پارتياىشىلىك ىرىكتەۋى تۋرالى، وتكەن سايلاۋ بارىسى جايىندا ەگجەي-تەگجەيلى ايتتىم. بىزدە دەپۋتاتتىق كورپۋس ايتارلىقتاي جاڭارىپ، ونىڭ قۇرامىنا ايەلدەردىڭ 30%-ى مەن جاستاردىڭ 20%-ى كىردى. بۇل دا حالىقارالىق ساياسي فورۋمدا تىلگە تيەك ەتىلدى. Nur Otan پارتياسى جانىنداعى رەسپۋبليكالىق قوعامدىق كەڭەستەردىڭ قۇرىلۋى مەن ماڭىزدىلىعى جايلى دا مالىمەت بەرىپ ءوتتىم»، - دەيدى دەپۋتات.
جاس دەپۋتات سونداي-اق «قازاقستان حالقى اسسامبلەياسى» ينستيتۋتى تۋرالى ءتۇسىندىرىپ، ونىڭ قازاقستان رەسپۋبليكاسى پرەزيدەنتىنىڭ جانىنداعى بىرەگەي ورگان ەكەنىن، باستى مىندەتى مەملەكەتتىك ۇلتتىق ساياساتتى ازىرلەۋگە جانە ىسكە اسىرۋعا ىقپال ەتۋ بولىپ تابىلاتىندىعىن التى قۇرلىق الدىندا اتاپ ءوتتى.
اتالعان فورۋمنىڭ ماقساتى ساياساتكەرلەردىڭ ءتۇرلى ەلدەردىڭ ساياسي جۇيەسىنىڭ تاجىريبەسىمەن الماسۋى، سونداي-اق بولاشاقتا كەدەرگىسىز تىكەلەي ىنتىماقتاسۋعا، ءتىپتى الەمدىك ساياساتكەرلەرمەن كەڭەسۋگە مۇمكىندىك بەرۋ بولىپ تابىلادى.