ەكىجاقتى ىنتىماقتاستىق جايلى ءسوز بولدى.
الماتى وبلىسىنىڭ اكىمى مارات سۇلتانعازييەۆ ەيب وكىلدەرىمەن كەزدەسۋ بارىسىندا قونايەۆ قالاسىنىڭ ءتۇرلى سالالارداعى جوباسى بويىنشا ەكىجاقتى ىنتىماقتاستىق جايلى ايتتى، دەپ حابارلايدى Almaty-akshamy.kz.
«الماتى وبلىسى كەز كەلگەن سالانى دامىتۋعا ىڭعايلى ءوڭىر. ونىڭ ىشىندە، الەۋمەتتىك سالا، ينفراقۇرىلىم، لوگيستيكا، بالىق، مال، ەگىن شارۋاشىلىعى، بالاما ەنەرگيا كوزى سالالارى بار. ايتا كەتەرلىگى، ايماقتا ەت ەكسپورتىنان گورى بالىق ەكسپورتى جاقسى دامىپ كەلەدى»، – دەدى جيىن بارىسىندا مارات سۇلتانعازييەۆ.
قونايەۆ قالاسىن IT ماماندارىنىڭ شوعىرلانعان، ونەركاسىبى دامىعان، تازا ەكولوگيالىق قالا ەتۋ ءۇشىن ءتۇرلى جوبالار جاسالىپ جاتىر. جانە ءتيىستى ماماندار شەتەل ينۆەستورلارىمەن ۇنەمى كەزدەسۋ وتكىزىپ وتىرادى.
«ەۋروپالىق ينۆەستيسيا بانكىنىڭ (ەيب) كۇش-جىگەرى 4 سالاعا باعىتتالعان: يننوۆاسيالاردى قولداۋ؛ شاعىن بيزنەستى دامىتۋ؛ كليماتتى قورعاۋ؛ ينفراقۇرىلىم وبەكتىلەرىن قۇرۋ. ەيب مەملەكەتتىك جانە جەكە سەكتورعا، ونىڭ ىشىندە يننوۆاسيالىق ستارتاپتاردى قارجىلاندىرۋ ءۇشىن كرەديتتەر بەرەدى. شاعىن جانە ورتا بيزنەسكە (شوب) ادەتتە جەرگىلىكتى بانكتەر ارقىلى قولداۋ كورسەتىلەدى. بۇل رەتتە، ورتاشا كولەمدى كومپانيالار ەيب-تەن عىلىمي-زەرتتەۋ سالاسى مەن دامۋعا ينۆەستيسيالار رەتىندە تىكەلەي قولداۋ الا الادى. ورتا ەسەپپەن، ەيب نەسيەسى جەكە ينۆەستورلار مەن مەملەكەتتىك قارجى مەكەمەلەرىنىڭ قاراجاتىن تارتۋعا جۇمىس ىستەۋگە مۇددەلى»، – دەدى ەيب-نىڭ مەملەكەتتىك مەكەمەلەرمەن جۇمىسىن دامىتۋ ءبولىمىنىڭ مامانى ادام برۋۋن.
ادام برۋۋننىڭ ايتۋىنا قاراعاندا، ەو كەڭەسىنىڭ (1999 ج. 22 جەلتوقسانداعى 2000/24/ەو) شەشىمىنە سايكەس ەيب ەو ەلدەرىندە جانە شەتەلدە، ونىڭ ىشىندە ازيادا جوبالاردى قارجىلاندىرۋ بويىنشا كرەديتتىك وپەراسيالاردى جۇرگىزۋگە مانداتقا يە. بۇل بانك 2 جىلدان 6 جىلعا دەيىنگى جەڭىلدىكتى كەزەڭىمەن 7 جىلدان 20 جىلعا دەيىنگى مەرزىمگە نەسيە بەرەدى.
«ءىرى اۋقىمدى جوبالاردى جۇزەگە اسىرۋ ءۇشىن بانككە ەو بيۋدجەتىنەن كەپىلدىك قاجەت. سوندىقتان ەيب وپەراسيالارىن دامۋشى ەلدەرگە تاراتۋ تۋرالى ماسەلەنى شەشۋگە ەو باسشىلىعىنىڭ ساياسي شەشىمى كەرەك. ەيب جەڭىلدەتىلگەن ورتا جانە ۇزاق مەرزىمدى نەگىزدە، ەڭ الدىمەن كولىك، ينفراقۇرىلىم، ەنەرگەتيكا، قورشاعان ورتانى قورعاۋ سالاسىندا جوبانىڭ جالپى ينۆەستيسيالىق قۇنىنىڭ 50% اسپايتىن مولشەردە كرەديتتەر بەرە الادى»، – دەدى ادام برۋۋن ءوز سوزىندە.
ەيب-نىڭ جەكە سەكتوردى قارجىلاندىرۋعا جاۋاپ بەرەتىن مامانى جان-جاك سۋلاكرۋ بولسا كەز كەلگەن باستاماعا بايلانىستى ورتاق شەشىمگە كەلۋگە دايىن ەكەنىن، دەسە دە، تۋريزم سالاسىنا قارجى بولە المايتىندارىن كەسىپ ايتتى.
كەزدەسۋ سوڭىندا وبلىس اكىمى مارات سۇلتانعازييەۆ ايماققا ينۆەستيسيا قۇيۋعا نيەتتى كومپانيالاردىڭ كوپ ەكەنىن اتاپ ءوتىپ، ىنتىماقتاستىق ەكىجاقتى ەمەس، ءۇشجاقتى بولۋى دا مۇمكىن ەكەن جەتكىزدى.