الماتى وبلىسىنداعى تاعى ءبىر سپورت كەشەنى اشىلدى

الماتى وبلىسىنداعى تاعى ءبىر سپورت كەشەنى اشىلدى

ەلباسىنىڭ 100 دەنە شىنىقتىرۋ-ساۋىقتىرۋ كەشەنىن سالۋ تۋرالى تاپسىرماسىنا وراي الماتى وبلىسىندا تاعى ءبىر وسىنداي سپورتتىق كەشەن اشىلدى، دەپ حابارلادى Almaty-akshamy.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.

جاڭا نىسان كوكسۋ اۋدانىنىڭ بالپىق بي اۋىلىندا سالىندى. ەندى اۋىلداعى 17 مىڭ تۇرعىن مۇندا دەنساۋلىعىن شىڭداپ، كاسىبي سپورتتىڭ 12 تۇرىمەن اينالىسا الادى،  دەپ حابارلايدى الماتى وبلىسى اكىمىنىڭ باسپا ءسوز قىزمەتى.

ەلدى مەكەن تۇرعىندارىن قۋانىشتارىمەن كوكسۋ اۋدانىنىڭ اكىمى الماس ءادىل، ەركىن كۇرەستەن وليپيادا ويىندارىنىڭ قولا جۇلدەگەرى ماۋلەن مامىروۆ جانە ارداگەرلەر اراسىندا گىر كوتەرۋ سپورتىنان الەم چەمپيونى جۇماحان كۇزبايەۆ قۇتتىقتاپ، اۋىل جاستارىنا تاباندىلىق پەن قاجىرلىلىق، سپورتتا زور جەتىستىكتەر تىلەدى. عيماراتتىڭ سالتاناتتى لەنتاسى قيىلدى.

زاماناۋي سپورت كەشەنىنىڭ قۇرىلىسىنا 673 ملن. تەڭگە جۇمسالدى. عيماراتتىڭ جالپى الاڭى 3 مىڭ شارشى مەتر. كۇرەس، بوكس، كوماندالىق ويىندار زالدارى، سكالودروم، ترەناجەر زالى جابدىقتالعان، سول سياقتى 180 ورىندىق كورەرمەن تريبۋناسى بار. باسكەتبول، ۆولەيبول، گاندبول، مينيفۋتبول، بادمينتون، بوكس، تەننيس، كۇرەس سياقتى سپورتتىڭ 12 تۇرىمەن اينالىسۋعا بارلىق جاعداي جاسالعان. سونىمەن بىرگە جابدىقتالعان مەديسينالىق كابينەت، سەبەزگىسى بار كيىم شەشەتىن ورىن، گاردەروب، 16 ورىندىق بۋفەت تە بار. مۇمكىندىگى شەكتەۋلى جانداردىڭ دا سپورتپەن اينالىسۋىنا بارلىق مۇمكىندىك قاراستىرىلعان.  

اتاپ وتسەك، بۇگىنگى كۇنى الماتى وبلىسىندا 15 دەنە شىنىقتىرۋ-ساۋىقتىرۋ كەشەنى جۇمىس ىستەيدى. سول قاتاردا شالعايداعى رايىمبەك اۋدانىنىڭ نارىنقول اۋىلىندا جانە بالقاش اۋدانىنىڭ باقاناس اۋىلىندا دا جاڭا سپورت كەشەندەرى سالىندى.