وبلىستا 34 اۋماقتى سۋ باسۋ ءقاۋپى بار
الماتى وبلىسىندا ءقاۋىپتى دەڭگەيدەگى 34 اۋماقتى سۋ باسۋى مۇمكىن. الدىن الامىز دەگەنمەن، ازىرگە امالىن تاپپاعان جامبىل اۋدانىنىڭ تۇرعىندارى دا قيىندىق كورىپ وتىر. كوشەنى شايىپ كەتكەن سۋ ەسىك الدىنا شىعار جولدى دا بوگەپتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
6 كۇن بۇرىن باستالعان تاسقىن ءالى دە توقتاماعان. كەرىسىنشە سۋدىڭ دەڭگەيى كوتەرىلىپ، قار ەرىپ، جاعداي قيىنداي تۇسكەن.
«كەلىپ جاتقان قۇتقارۋشىلار ەشتەڭە جاساي الماي جاتىر. اكەلگەن اپپاراتى جەردى قازا المايدى. سوندىقتان سۋ جولدى جاۋىپ، جۇرۋگە مۇمكىندىك بولماي قالدى»، – دەدى سارىباي بي اۋىلىنىڭ تۇرعىنى اينۇر سوۆەتحان قىزى.
«قىزىل سۋ باسىپ كەتەدى، جىلدا قايتالانادى. بىلتىر جول سالىنىپ، تۇرعىندار قۋانىپ قالىپ ەدى. بيىل كورشىنىڭ ءۇيى باتىپ كەتتى، قوراسىنا دەيىن سۋ باسىپ قالدى»، – دەدى سارىباي بي اۋىلىنىڭ تۇرعىنى مەيرامحان قارابەك قىزى.
50-گە جۋىق مامان ءتۇرلى ءتاسىل ىستەگەنىمەن ازىرگە سۋدىڭ توقتار ءتۇرى جوق. تۇستەن كەيىن اعىنى كۇشەيەتىن تاۋ سۋى ءۇي الدىن تۇگەل الىپ كەتكەن. تاسىپ كەلىپ، توقتاپ تۇرعان سۋ ءقازىر كوشەدەگى قوزعالىستى تەجەگەن. توتەنشەلىكتەر وقيعا ورنىندا جۇمىس ىستەپ جاتقانىمەن، ماسەلەنى تولىققاندى شەشۋ ازىرگە مۇمكىن بولماي تۇر.
«ارىق قازىلماعان. سول سەبەپتى سۋدىڭ اعىسىن كوشە بويىمەن وزەنگە قاراي بۇرۋ جۇمىستارى جۇرگىزىلىپ جاتىر»، – دەدى جامبىل اۋداندىق تجب باستىعى ەرسىن جاعىپاروۆ.
«ارىق جۇيەسىن سالۋ ءۇشىن 3 اۋىلعا 30 ميلليونداي اقشا سۇراپ وتىرمىز. سوعان بيۋدجەتتىك سۇرانىس بەرىپ قويدىق»، – دەدى قاراسۋ اۋىلدىق وكرۋگىنىڭ اكىمى نۇرجان داۋرەنبايەۆ.
سۇرانىستى جەرگىلىكتى ءماسليحات جيىنىندا قارايدى. شەشىم شىقسا، جۇمىس اتقارىلادى. ال وبلىستا وسىنداي 34 اۋماقتى سۋ باسۋ ءقاۋپى بار.