مادەنيەت جانە سپورت ءمينيسترى اسحات ورالوۆ جەلىدە الماتى وبلىسى قاراساي اۋدانىندا ورنالاسقان وليمپيادالىق دايارلاۋدىڭ رەسپۋبليكالىق بازاسى قۇرىلىسىمەن تانىستى.
بۇل تۋرالى ول Telegram ارناسىندا جازدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ءمينيستردىڭ سوزىنشە، بارلىق حالىقارالىق ستاندارتقا سايكەس كەلەتىن زاماناۋي بازا پرەزيدەنت قاسىم-جومارت توقايەۆتىڭ تاپسىرماسى بويىنشا سالىنىپ جاتىر.
«40 گا اۋماقتى الىپ جاتقان سپورتتىق بازانى شاعىن وليمپيادا قالاشىعى دەسە دە بولادى. مۇندا ءبىر مەزەتتە 2 300 ادام وليمپيادالىق سپورتتىڭ 23 تۇرىمەن: جەڭىل جانە اۋىر اتلەتيكا، ۆولەيبول، باسكەتبول، گاندبول، ميني-فۋتبول، شايبالى حوككەي، مانەرلەپ سىرعاناۋ، كونكيمەن جۇگىرۋ، كوركەم جانە سپورتتىق گيمناستيكا، بوكس، جەكپە-جەك، سونىڭ ىشىندە كۇرەستىڭ بارلىق ءتۇرى، سۋ سپورتى تۇرلەرىمەن، وق جانە ساداق اتۋ جانە ت.ب. اينالىسا الادى. بازادا 9 جابىق سپورت كەشەنى بار: بۇل جەڭىل اتلەتيكا مانەجى، مۇز ارەناسى، كوپفۋنكسيونالدى سپورت زالى، گيمناستيكا جانە اۋىر اتلەتيكا زالى، 10 جولاقتى 50 مەترلىك وليمپيادالىق باسسەين، جەكپە-جەك زالى، مەرگەندەرگە ارنالعان ساداق جانە وق اتۋ الاڭى، 420 ورىندىق قوناق ءۇي، دوپينگكە قارسى زەرتحاناسى بار مەديسينالىق ورتالىق پەن باسقا دا نىساندار»، - دەپ جازدى اسحات ورالوۆ.
بازا اۋماعىندا سپورتپەن شۇعىلدانىپ قانا قويماي، ءبىلىم الۋعا، بوس ۋاقىتتى پايدالى ءارى قىزىقتى وتكىزۋگە بارلىق جاعداي جاسالادى.
«اتاپ ايتقاندا، كىتاپحانا، بىرنەشە كونفەرەنس زال، بوۋلينگ، سپورت دۇكەنى مەن ءدامحانالار بولادى. جوبا شاعىن جانە ورتا كاسىپتى دامىتىپ قانا قويماي، 800-گە جۋىق ادامدى تۇراقتى جۇمىسپەن قامتاماسىز ەتەدى. بولاشاقتا بازا اۋماعىندا الەم چەمپيوناتتارىنىڭ كەزەڭدەرىن، ۋنيۆەرسيادا، سپارتاكيادا سىندى حالىقارالىق جارىستاردى وتكىزۋدى جوسپارلاپ وتىرمىز. ول ءۇشىن مۇندا بارلىق مۇمكىندىك قاراستىرىلعان»، - دەلىنگەن ءمينيستردىڭ جازباسىندا.
ول سونداي-اق كەشەن قۇرىلىسى 2005 جىلى باستالعانىن، الايدا ءار جىلدارى قارجىلىق جانە باسقا دا ماسەلەلەرگە بايلانىستى قۇرىلىس توقتاپ قالعانىن ءمالىم ەتتى.
«جوسپار بويىنشا قۇرىلىس جىل سوڭىنا دەيىن اياقتالۋى كەرەك. ءقازىر سىرتقى ينجەنەرلىك جەلىلەردى تارتۋ جانە اسفالت توسەۋ سياقتى ماسەلەلەر شەشىلىپ جاتىر. كەڭەس قورىتىندىسىنا ساي جاۋاپتى مەكەمە باسشىلارىنا قۇرىلىستى ساپالى اياقتاۋ تۋرالى تاپسىرما بەردىم»، - دەپ جازدى مادەنيەت جانە سپورت ءمينيسترى اسحات ورالوۆ.
ەسكە سالساق، بۇعان دەيىن اسحات ورالوۆ وبلىستارداعى سپورت نىساندارىندا تۇگەندەۋ ءجۇرىپ جاتقانىن، سونداي-اق بيىل 113 جاڭا سپورت نىسانىن سالۋ جۇمىستارى جالعاساتىنىن ايتقان بولاتىن.