سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆتىڭ تاپسىرماسى بويىنشا ۆەدومستۆو سۋ رەسۋرستارىن باسقارۋداعى زاڭ بۇزۋشىلىقتارمەن، سۋدىڭ «كولەڭكەلى» نارىعىمەن جانە سۋ سالاسىنداعى سىبايلاس جەمقورلىق تاۋەكەلدەرىنە قارسى كۇرەستى جالعاستىرىپ جاتىر.
ناتيجەسىندە، سۋ رەسۋرستارىن زاڭسىز جانە ءتيىمسىز پايدالانۋ، مەملەكەتتىك ساتىپ الۋعا بايلانىستى زاڭ بۇزۋشىلىقتار انىقتالدى، دەپ حابارلايدى aqshamnews.kz سۋ رەسۋرستارى جانە يرريگاسيا مينيسترلىگىنە سىلتەمە جاساپ.
1. الماتى وبلىسىنىڭ كۇرتى اۋدانىندا شارۋا قوجالىقتارىنىڭ سۋارمالى سۋدى جەرگىلىكتى «قازسۋشار» فيليالىمەن كەلىسىمشارتقا وتىرماي پايدالانعاندارى انىقتالدى. اتاپ ايتقاندا، 100 گا ەگىس القابىن سۋارۋ ءۇشىن سۋدى زاڭسىز العان.
2. سونداي-اق، كەيبىر گيدروتەحنيكالىق قۇرىلىستاردىڭ توزۋىنا بايلانىستى كانالدا قوسىمشا سۋ شىعىنى انىقتالدى. ياعني، فيليال باسشىلىعىنىڭ نىسانداردىڭ تەحنيكالىق جاي-كۇيىنە جەتكىلىكسىز باقىلاۋ جۇرگىزۋىنە بايلانىستى سۋ رەسۋرستارىن ءتيىمسىز پايدالانۋ جانە ەسەبىن جۇرگىزۋ وقيعالارى تىركەلدى.
3. بۇدان بولەك، مەملەكەتتىك ساتىپ الۋدا زاڭ بۇزۋ فاكتىلەرى انىقتالدى. فيليال زاڭدى جانە ىشكى نورماتيۆتىك قۇجاتتاردى بۇزا وتىرىپ، ءبىر كوزدەن مەملەكەتتىك ساتىپ الۋ تۋرالى 7 كەلىسىمشارت جاساسقان. وسىعان دەيىن، 2023 جىلعى شىلدەدە جالپى سوماسى 17،5 ملن تەڭگەگە سول جاعالاۋ ماگيسترالدى كانالىنىڭ جەر بولىگىن مەحانيكالىق تازالاۋ قىزمەتىن كورسەتۋگە وسىنداي تاسىلمەن شارت جاسالعان. ياعني، زاڭ بۇزۋشىلىق جۇيەلى تۇردە قايتالانعان.
4. فيليال ديرەكتورىنىڭ مىندەتىن اتقارۋشى جاقىن تۋىستارىمەن بىرگە جۇمىس ىستەۋگە جول بەرمەۋ تۋرالى سىبايلاس جەمقورلىققا قارسى زاڭنامادا بەلگىلەنگەن تالاپتى ساقتاماعان.
تەكسەرىس قورىتىندىسى بويىنشا بارلىق انىقتالعان قۇقىق بۇزۋشىلىقتاردىڭ جالپى سوماسى شامامەن 20 ملن تەڭگەنى قۇرادى.
بارلىق انىقتالعان زاڭ بۇزۋشىلىقتار بويىنشا ماتەريالدار ءتيىستى ۋاكىلەتتى ورگاندارعا جىبەرىلدى. 3 قۇقىق بۇزۋشىلىق فاكتىسى بويىنشا فيليال ديرەكتورىنىڭ مىندەتىن اتقارۋشى تۇلعاعا اكىمشىلىك ايىپپۇل سالىندى. ايتا كەتۋ كەرەك، ديرەكتوردىڭ م.ا. وسىعان دەيىن دە بىرنەشە مارتە ەسكەرتۋ تۇرىندە تارتىپتىك جاۋاپكەرشىلىككە تارتىلعان.
وبلىستىق فيليالعا كەمشىلىكتەردى جويۋ بويىنشا ۇسىنىستار بەرىلدى.
«قازسۋشاردىڭ» باسقا دا وبلىستارداعى فيليالدارى تەكسەرىستەن وتەدى. ايتا كەتۋ كەرەك، سۋدىڭ «كولەڭكەلى» نارىعىمەن ءتيىمدى كۇرەسۋ ءۇشىن مينيسترلىك جانىنان سۋ رەسۋرستارىن رەتتەۋ، قورعاۋ جانە پايدالانۋ جونىندە جاڭا كوميتەت قۇرىلدى.
ەسكە سالا كەتەيىك، وسىعان دەيىن جوعارى اۋديتورلىق پالاتا مەن سۋ رەسۋرستارى جانە يرريگاسيا مينيسترلىگى بىرلەسىپ جۇرگىزگەن تەكسەرىستەردىڭ قورىتىندىسى بويىنشا «قازسۋشار» كاسىپورىنىنىڭ باسشى لاۋازىمىنداعى 5 قىزمەتكەرى تارتىپتىك جاۋاپكەرشىلىككە تارتىلعان بولاتىن. ال، سۋ رەسۋرستارى جانە يرريگاسيا مينيسترلىگىنىڭ ىشكى اۋديت دەپارتامەنتى جامبىل وبلىسىندا سۋدى زاڭسىز پايدالانۋدىڭ 10 فاكتىسىن انىقتادى. بۇگىنگى تاڭدا فيليال باسشىسى قىزمەتىنەن بوساتىلدى.