قۇرمەتكە بولەنىپ، كەزدەسۋگە كەلگەندەردىڭ قاتارىندا تىل ارداگەرلەرى دە بار
الماتى وبلىسىندا قان مايدانعا اتتانىپ، سۇم سوعىسقا قاتىسقان 10 ارداگەر بار، دەپ حابارلايدى Almaty-akshamy.kz Almaty.tv-گە سىلتەمە جاساپ.
عۇمىرى عاسىرعا جالعاسقان مايدانگەرلەردىڭ ءبارى بوزبالا شاقتا قارۋ الىپ، سوعىسقا اتتانعان. سولاردىڭ ءبىرى – 99 جاسقا تولعان شايكە ىدىرىسوۆ. ول 17 جاسىندا جاياۋ اسكەر قاتارىنا الىنىپ، بەلارۋس پەن پرۋسسيانى ازات ەتۋگە قاتىسقان. ساپتا ءجۇرىپ سان رەت جاراقات السا دا، ەرلىگىمەن كوزگە ءتۇسىپ، «ەرلىگى ءۇشىن»، «قىزىل جۇلدىز» مەدالدەرىمەن ماراپاتتالىپتى.
– ال، بالالارىم، سەندەر مەن سىيلاپ شاقىردىڭدار، راقمەت! دەنساۋلىق مىقتى بولسىن! تىلەگەن تىلەكتەرىڭە، اڭساعان ارماندارىڭا جەتىڭدەر. ءبىراق مەن كورگەن قورلىقتى كورمەڭدەر، جاقسىلىقتىڭ كۋاسى بولىڭدار، بالالارىم! – دەدى ۇوس ارداگەرى شايكە ىدىرىسوۆ.
– ءبىزدىڭ بۋىن تاريحتى، سوعىس ارداگەرلەرىنىڭ ەڭبەگىن ءبىلۋى كەرەك! بۇگىنگى بەيبىتشىلىكتىڭ قانداي قيىندىقپەن كەلگەنىن ۇرپاقتىڭ تۇسىنگەنى ماڭىزدى. مەرەكەدە قۇرمەت كورسەتىپ، شاقىرىپ، ەلەپ جاتقاندارىڭا راقمەت! اسپانىمىز اشىق، ءومىرىمىز تىنىش بولسىن!، – دەدى ۇوس ارداگەرى ءفودور كوۆالوۆ.
قارت جاۋىنگەرلەر قاتارلاستارىن ەسكە الدى. ولاردىڭ داستارحان باسىنداعى جيىنى مايدانگەر-دوستارىنىڭ ەرلىگىن دارىپتەپ، كەلەر ۇرپاققا بەيبىت كۇننىڭ باعاسىن تۇسىندىرۋگە ۇلاستى. ال ارداگەرلەرگە العىس ايتىپ، قۇرمەت كورسەتۋدە باس بولعان جومارت جان «سوعىستا ەتىگىمەن قان كەشىپ، ەسەپسىز ەرلىك كورسەتكەندەرگە سىي-قۇرمەتتىڭ قايسىسى دا لايىق!»دەيدى.
– سول كەزدە جاپ-جاس كەزىندە سوعىسقا بارىپ، 5 جىلداي جاۋمەن شايقاسىپ كەلگەن اتالارىم عوي. سول ءۇشىن مىندەتتى تۇردە قۇرمەتتەۋىم كەرەك، قولداۋىم كەرەك. سول كىسىلەردىڭ ارقاسىندا وسىنداي دارەجەگە جەتتىم، – دەدى كاسىپكەر دانيار نۇربايەۆ.
قۇرمەتكە بولەنىپ، كەزدەسۋگە كەلگەندەردىڭ قاتارىندا تىل ارداگەرلەرى دە بار. اق جاۋلىعى جەلبىرەپ، الاڭسىز كۇننىڭ باعاسىن تۇسىنۋگە ۇندەگەن انالار دا ەل ىرگەسىنىڭ بەرىكتىگى ءۇشىن ەڭبەكتەنۋگە شاقىرادى. جيىن سوڭىندا سوعىستى كورىپ، سۇراپىل جىلدىڭ قيىندىعىن سەزگەن ارداگەرلەر جاس ۇرپاققا اق باتاسىن بەرىپ، كەلەر كۇنگە بەيبىت زامان تىلەدى.