الماتى وبلىسىندا ورنالاسقان كومپانيا ءونىمى وسىعان دەيىن ورتالىق ازيا، گرۋزيا، مونعوليا، جۇڭگو مەن رەسەيگە ەكسپورتتاپ كەلگەن.
بيىل وعان تاعى ەكى مەملەكەت قوسىلدى. ەندى قازاقستاندا شىعارىلعان بالمۇزداقتى ارمەنيا مەن ساۋد ارابياسىنان دا كەزدەستىرۋگە بولادى، دەپ حابارلايدى aqshamnews.kz 24.kz-كە سىلتەمە جاساپ.
الداعى ونجىلدىقتا كاسىپورىن ءونىم كولەمىن ءۇش ەسە ارتتىرۋدى كوزدەپ وتىر. بۇل – الماتى وبلىسىنداعى جالعىز بالمۇزداق شىعاراتىن كاسىپورىن. العاشىندا وتباسىلىق سەح قانا بولعان. ءقازىر ەلىمىزدە شىعارىلاتىن بالمۇزداقتىڭ تەڭ جاترىسى وسى كاسىپورىننىڭ ەنشىسىندە. جىل ساناپ ەكسپورتتاۋشى ەلدەر قاتارىن دا ارتتىرىپ كەلەدى. ول ءۇشىن، ارينە، ءبىرىنشى كەزەكتە ءونىم كولەمىن ارتتىردى. بيىل كومپانيا اۋقىمىن كەڭەيتىپ، جاڭا جەلىلەردى ىسكە قوسۋ ءۇشىن 35 ملرد تەڭگە ينۆەستيسيا قۇيدى. ونىڭ قۇرىلىسى اياقتالعاندا فابريكا كۇنىنە 350 توننا بالمۇزداق شىعارادى. قازىرگى قۋاتتىلىعى – تاۋلىگىنە 150 توننا.
دميتريي دوكين، كاسىپورىننىڭ ديرەكتورلار كەڭەسىنىڭ ءتوراعاسى:
ءبىز بارىنشا ساپالى ءونىم وندىرۋگە كۇش سالىپ جاتىرمىز. ءقازىر بىزبەن الەمنىڭ ەڭ مىقتى دەگەن بالمۇزداق فابريكالارى ساناسادى. مەن ءوزىم 30 جىلدان استام بالمۇزداق وندىرىسىندە جۇمىس ىستەپ كەلە جاتىرمىن. سالانى جەتىك بىلەم. ەڭ مىقتى كاسىبي مامانداردى تارتتىق. مۇنداعىداي تەحنولولگيا كوپ جەردە كەزدەسە بەرمەيدى. ءبىزدىڭ بالمۇزداقتار بالالاردىڭ عانا ەمەس، ۇلكەندەردىڭ دە سۇيىكتى ءتاتتىسى.
ءقازىر كومپانيا بالمۇزداقتىڭ 160 ءتۇرىن شىعارادى. وعان قوسا، جارتىلاي دايىن فابريكاتتار مەن ءسۇت ونىمدەرىن دە ۇسىنادى. بۇگىندە 3،5 مىڭ ادام جۇمىس ىستەيدى. جاڭا جەلىلەر ىسكە قوسىلعاندا ولاردىڭ سانى 5 مىڭعا كوبەيەدى. جۇمىسشىلاردىڭ اس-سۋى، تاسىمالى تۇگەل قاراستىرلعان.
ۇلان بورانباي ۇلى، كومپانيا قىزمەتكەرى:
الەم بويىنشا 36 ال، ەۋروپا، ازيا-تىنىق مۇحيتى ىنتىماقتاستىق ۇيىمدارى مەملەكەتتەرىنىڭ ىشىندە 6-ورىنعا كوتەرىلدى. بۇل دەگەنىمىز، 2022 جىلعا قاراعاندا 2023 قورىتىندىسى بويىنشا كوتەرىلدىك. ەندى ءبىزدىڭ جوسپارىمىز ودان دا ۇلكەن اۋقىمدى. جىلىنا 23 مىڭ توننادان استام بالمۇزداق ءوندىرىپ 10-نان اسا مەملەكەتكە ەكسپورتتاپ جاتىرمىز.
تۇراقتى ءوسۋ مەن يننوۆاسيا كومپانياعا ءوز سالاسىندا كوشباسشى بولىپ قالۋعا جول اشتى. مۇنداي كاسىپورىنعا مەملەكەت بارىنشا قولداۋ ءبىلدىرىپ وتىر. ءوندىرىستى جاڭعىرتۋ، ساپانى قاداعالاۋ، لوگيستيكانى جەتىلدىرۋ جۇمىستارى جالعاسا بەرەدى.