زاۋىت باسشىسى زاڭعا باعىنباي وتىر
الماتى وبلىسى قاينازار اۋىلىندا كىرپىش زاۋىتىنىڭ جۇمىسىنا كوپشىلىك نارازى، دەپ حابارلايدى Almaty-akshamy.kz Almaty.ty-گە سىلتەمە جاساپ.
ارنامىزعا ارىزىن ايتىپ، سۇحبات بەرگەن اۋىل ازاماتتارىنىڭ ايتۋىنشا، زاۋىتتى سوتقا بەرىپ، جەڭىپ تە العان. الايدا اۋىل ورتاسىنان ويىپ شۇڭقىر قازىپ، كىرپىش شىعارىپ جاتقان زاۋىت باسشىسى زاڭعا باعىنباي وتىر.
اۋىلدىڭ اۋماعىن كەڭەيتەمىز دەپ بولىنگەن جەرگە 2006 جىلى كىرپىش زاۋىتىن سالىنعان. تۇرعىندار بۇل جەردە زاۋىت بولاتىنىن بىلمەپتى. ءتۇتىنى بۋداقتاپ، توزاڭى تۇتاس اۋىلدى الا باستاعاندا عانا كورگەن.
«ەكىنىڭ بىرىندە، كىشكەنتاي بالالارعا دەيىن اللەرگيا پايدا بولدى. اپتەكادان ءدارى ساتىپ الىپ، ءبارى قولدانادى. بۇل جەر جاسىل جايلاۋ ەدى، ءقازىر ارال سياقتى شاڭ، توپىراققا اينالدى»، – دەدى قاينازار اۋىلىنىڭ تۇرعىنى بەرىك دۋانبەكوۆ.
«2022 قاراشا ايىندا زاڭ تولىق كۇشىنە ەندى. حالىقتى ەسكەرىپ وتىرعان جوق، زاڭدى بەلشەسىنەن باسىپ وتىر. ولارعا سۇرانىس كوبەيگەن مەزگىلدى جۇمىس ىستەۋگە مۇمكىنشىلىك بەرىپ وتىر. سوندىقتان سوت ورىنداۋشىلاردىڭ ىسىنە كۇمانمەن قارايمىز»، – دەدى قاينازار اۋىلىنىڭ تۇرعىنى نۇرجان قالييەۆ.
ۇكىم شىقسا دا، ۇيىپ-توگىپ كىرپىش شىعارىپ جاتىر دەگەن زاۋىتتىڭ باسشىسى، بازىناسىن ايتقان بۇقارىنىڭ الدىندا بوي كورسەتپەدى. تەك ءوزىن زاڭدى وكىلىمىن دەپ تانىستىرعان ازامات قاقپا الدىندا جاۋاپ بەرىپ، زاۋىت جۇمىس ىستەمەيدى دەپ سەندىردى.
«قولدارىڭىزداعى قاۋلىعا قاتىستى ءقازىر جۇمىس ىستەمەيدى. مەن بۇل جەردە زاڭگەرمىن. باسشىلىق بولماعاندىقتان، ىشكە كىرگىزە المايمىن»، – دەدى كىرپىش زاۋىتىنىڭ زاڭگەرى نۇرجان ماقساتوۆ.
«زاڭدى تۇلعاسىنىڭ ايتىپ تۇرعان ءسوزىن ەستىدىڭىز عوي. ءبىراق ءتۇتىن بۇرقىراپ، زاۋىت ىستەپ تۇر. جاڭا شىعارىلعان كىرپىش تۇر»، – دەدى قاينازار اۋىلىنىڭ تۇرعىنى باۋىرجان جاڭابايەۆ.
بەس مىڭ حالقى بار قاينازار اۋىلىندا ءتورت كىرپىش زاۋىتى بار ەكەن. ونىڭ بىرەۋىن اۋىل جۇرتى جابىلىپ ءجۇرىپ جاپقىزعان. ال قالعانى قىش قاقتاپ، كىرپىش كۇيدىرىپ، سول كۇيى جۇمىس ىستەپ جاتقان كورىنەدى. ال حالىق نارازى بولعان مىنا زاۋىتتىڭ كەپتىرگىش پەشىنە قاتىستى قاۋلىنىڭ ورىندالماي جاتقانىن اۋىل اكىمى دە راستايدى.
«ءىس سوت ورىنداۋشىلارىنا بەرىلدى» دەيدى. زاۋىت جۇمىسى ءجۇرىپ جاتىر. اۋداندىق سوت ورىنداۋشىلارى كەلىپ بۇزامىز دەسە، ءوز تاراپىمىزدان اتسالىسۋعا دايىنبىز»، – دەدى راحات اۋىلدىق وكرۋگىنىڭ اكىمى قايسار بوگىسپايەۆ.
زاۋىتتىڭ زاڭدى وكىلى ءبىز قويعان ساۋالداردان قانشا بۇلتارسا دا، زاۋىت ىشىندە جۇك كولىكتەرىنىڭ قايدان جۇرگەنىن ءتۇسىندىرىپ بەرە المادى. زاڭ تالابىمەن عانا جۇرەتىنىن ايتىپ، اقتالدى.
«بەلگىلى وبەكتىنىڭ عانا بۇزىلۋىنا شەشىم شىققان عوي. بارلىق قىزمەتتى توقتاتۋعا شەشىم شىققان جوق. زاڭدى كۇشىنە ەنگەن جوق. ءبىز شاعىمدانىپ وتىرمىز»، – دەدى كىرپىش زاۋىتىنىڭ زاڭگەرى نۇرجان ماقساتوۆ.
تالابىن ايتقان تۇرعىندار تارقاسا باستاپ ەدى، زاۋىت ىشىندەگى جۇك كولىكتەرى دە جونىنە كەتتى. قانشا جاسىرعانىمەن، زاۋىتتىڭ ءالى جۇمىس ىستەپ تۇرعانى انىق.