الماتى وبلىسىندا قىزىلشا جۇقتىرعاندار كوبەيدى

قىزىلشاعا قارسى ۆاكسيناسيا بالانىڭ 1 جانە 6 جاسىندا جۇرگىزىلەدى.

الماتى وبلىسىندا جىل باسىنان بەرى 1 مىڭنان استام ادام قىزىلشا اۋرۋىن جۇقتىرعان، دەپ حابارلايدى Almaty-akshamy.kz

وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ مالىمەتىنشە، سىرقاتتانۋشىلىقتىڭ جوعارى دەڭگەيى قاراساي (137،2)، ەڭبەكشىقازاق (114،1)، تالعار (70،5)، ىلە (54،2) اۋداندارىندا تىركەلگەن.

"ايتا كەتۋ كەرەك، سىرقاتتانۋشىلىقتىڭ باسىم بولىگىن، ياعني، 86%-ىن 14 جاسقا دەيىنگى بالالار قۇرايدى. ونىڭ ىشىندە، سىرقاتتانۋشىلىقتىڭ 5 جاسقا دەيىنگى بالالار اراسىندا تارالۋ جيىلىگى 85%-دى (جوعارى) قۇرادى. كاسىپتىك قۇرامىنا كەلسەك، 56% ۇيىمداستىرىلماعان بالالارعا، 18% مەكتەپكە دەيىنگى مەكەمەلەردىڭ تاربيەشىلەنۋلەرىنە، 13% مەكتەپ وقۋشىلارىنا،1% مەديسينالىق قىزمەتكەرلەرگە، ال 12% باسقا توپتارعا كەلەدى"، دەلىنگەن حابارلامادا.

ايتا كەتەيىك، قىزىلشامەن اۋىرىپ جاتقانداردىڭ 85%-ى ەكپە الماعاندار ەكەنى بەلگىلى بولدى.

"قىزىلشادان جالعىز ءتيىمدى قورعانىس – ول ۆاكسيناسيا. ەلىمىزدە قىزىلشاعا قارسى ۆاكسيناسيا بالانىڭ 1 جانە 6 جاسىندا جۇرگىزىلەدى. قىزىلشاعا قارسى ۆاكسيناسيا ءۇشىن قىزامىق پەن پاروتيتكە قارسى كومپونەنتپەن بىرىككەن ۆاكسينا قولدانىلادى"، دەلىنگەن الماتى وبلىستىق سانيتارلىق-ەپيدەميولوگيالىق باقىلاۋ دەپارتامەنتى تاراتقان حابارلامادا.