الماتى وبلىسىندا پوليسەيلەر كولىك تاسىمالداۋشى الاياقتاردى ۇستادى.
2 مامىردا استانا قالاسىنىڭ تۇرعىنى قاراساي اۋداندىق پوليسيا باسقارماسىنا ارىزدانعان، ول ءوز ارىزىندا بەلگىسىز ازامات ءوزىن اۆتوكولىك تاسىمالداۋ كومپانياسىنىڭ قىزمەتكەرى رەتىندە تانىستىرىپ، Changan UNI-K اۆتوكولىگىن يەمدەنگەنى تۋرالى ارىزداندى.
"تەرگەۋ بارىسىندا جابىرلەنۋشى استانادان مەگاپوليسكە كولىك ساتىپ الۋ ءۇشىن ۇشىپ كەلگەنى بەلگىلى بولدى. كولىكتى ساتىپ العاننان كەيىن ينتەرنەت جەلىسى ارقىلى اۆتوتاسىمالداۋ قىزمەتىنە تاپسىرىس بەرگەن. تاسىمالداۋ قىزمەتىنىڭ باعاسىن تالقىلاپ، ول كىلتتى كولىك جۇرگىزۋشىسىنە تاپسىرعان. الايدا، كەلىسىلگەن مەرزىمدە اۆتوكولىك جەتكىزىلگەن جوق"، – دەدى الماتى وبلىسى پد باستىعى باۋىرجان الەنوۆ.
جەدەل-ىزدەستىرۋ ءىس-شاراسىن وتكىزۋ بارىسىندا پوليسەيلەر وسى قىلمىسقا قاتىسى بار ەكى ەر ادامدى ۇستادى. اۆتوكولىك زاڭدى يەسىنە قايتارىلدى. قازىرگى ۋاقىتتا ولاردىڭ باسقا ۇقساس قىلمىستارعا قاتىسى بار-جوعى تەكسەرىلۋدە. تەرگەۋ جالعاسىپ جاتىر.