ارنايى وپەراسيالار كۇشتەرىنىڭ پاراشيۋتتىك دايارلىق ورتالىعىندا جەكە-كوماندالىق بىرىنشىلىككە كلاسسيكالىق پاراشيۋت سپورتى مەن توپتىق پاراشيۋت اكروباتيكاسىنان قازاقستان رەسپۋبليكاسى مەن قارۋلى كۇشتەردىڭ 29-اشىق چەمپيوناتى ءوتىپ جاتىر، دەپ حابارلايدى Almaty-akshamy.kz Inform.kz-كە سىلتەمە جاساپ.
قورعانىس مينيسترلىگىنىڭ مالىمەتىنشە، اتالعان سايىسقا ارنايى وپەراسيالار كۇشتەرىنىڭ، دەسانتتىق-شابۋىلداۋ اسكەرلەرىنىڭ، اسكەري-اۋە كۇشتەرىنىڭ، ۇلتتىق ۇلاننىڭ، «وتان» قب رەسپۋبليكالىق اەروكلۋبىنىڭ، قاراعاندى قالاسىنىڭ اۆياسيالىق قۇتقارۋ-ىزدەستىرۋ ورتالىعىنىڭ، باتىس قازاقستان وبلىسى ورال قالاسىنىڭ مامانداندىرىلعان بالالار-جاسوسپىرىمدەر سپورتتىق-تەحنيكالىق مەكتەبىنىڭ كوماندالارى قاتىسۋدا. بارلىعى 17 كوماندا، ولاردىڭ ىشىندە حالىقارالىق دارەجەدەگى سپورت شەبەرلەرى، سپورت شەبەرلەرى مەن شەبەر اتاعىنا ۇمىتكەرلەر، رازريادتى سپورتشىلار دا بار.
«قارۋلى كۇشتەردىڭ باسشىلىعى اسكەرلەردىڭ جاۋىنگەرلىك دايارلىعىنىڭ تىرەگى سانالاتىن اسكەري-قولدانبالى سپورت تۇرلەرىن دامىتۋعا مۇددەلى. سولاردىڭ ءبىرى – پاراشيۋت سپورتى. چەمپيونات بارىسىندا ءتيىستى قاۋىپسىزدىك شارالارى ساقتالىپ، جوعارى دەڭگەيدە وتەدى دەپ سەنەمىن. سايىس ءادىل ءوتىپ، ناعىز مىقتىلار جەڭىسكە جەتسىن»، - دەدى قرقك ارنايى وپەراسيالار كۇشتەرىنىڭ قولباسشىسى پولكوۆنيك بولات جورابايەۆ.
العاشقى بولىپ پاراشيۋتپەن سەكىرگەن ارنايى وپەراسيالار كۇشتەرىنىڭ قولباسشىسى بولات جورابايەۆ جارىستى اشىپ بەردى. سايىستا مىقتىلىعىن سىناۋشىلار قونۋ دالدىگىن بەلگىلەپ، 900-1200 مەتر بيىكتىكتەن جەكە جانە توپتىق سەكىرۋلەردى جانە 2200-2500 مەتر بيىكتىكتەن جەكە جانە توپتىق اكروباتيكالىق سەكىرۋلەر ورىندايدى.
چەمپيوناتتىڭ قورىتىندىسىنا سايكەس پاراشيۋت سپورتىنان قازاقستان مەن قارۋلى كۇشتەردىڭ قۇراما كوماندالارى جاساقتالادى.