بالالار اراسىندا اياق-قولى سىنىپ، باس-مي جاراقاتىن العان جانە جول-كولىك وقيعاسىنان زارداپ شەككەندەر كوپ
بىلتىر الماتى وبلىسىندا مىڭ جارىمعا جۋىق بالا جاراقات الىپ، اۋرۋحاناعا تۇسكەن. دارىگەرلەر جاز ايى باستالعالى بەرى مەديسينالىق كومەككە جۇگىنگەن بالالاردىڭ كوبەيگەنىن ايتادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بالالار اراسىندا اياق-قولى سىنىپ، باس-مي جاراقاتىن العان جانە جول-كولىك وقيعاسىنان زارداپ شەككەندەر كوپ.
كوپسالالى وبلىستىق بالالار اۋرۋحاناسىنىڭ ديرەكتورى تويبەكوۆ ارمان سەرىكباي ۇلىنىڭ ايتۋىنشا، كوپ جاعدايدا بالالار اتا-انانىڭ قاراۋىنسىز قالعان كەزدە جاراقات الادى. باس دارىگەر اۋرۋحانانىڭ تراۆماتولوگيا بولىمىندە كىشكەنتاي ەمدەلۋشىلەر سانى 2021 جىلى 32،7% – عا ارتقانىن ايتادى.
«2021 جىلى اۋرۋحانانىڭ تراۆماتولوگيا بولىمىندە ءار ءتۇرلى جاراقات العان 1433 بالا ەم قابىلدادى. ونىڭ ىشىندە 89-ى ءبىر جاسقا دەيىنگى سابيلەر. كوبىنە بالالار اتا-انانىڭ قاراۋىنسىز قالعان كەزدە جاراقات الاتىنى بەلگىلى. سوندىقتان ءبىز اتا-انالاردان بالالارىنا مۇقيات بولۋىن سۇرايمىز»، - دەيدى اۋرۋحانا ديرەكتورى ارمان سەرىكباي ۇلى.
سونىمەن قاتار كوپسالالى وبلىستىق بالالار اۋرۋحاناسىنىڭ باس دارىگەرى 2021 جىلى جاراقات پۋنكتى اشىلعانىن ايتتى.
«2021 جىلدان باستاپ اۋرۋحانادا جاراقات پۋنكتى اشىلدى. وندا جۇمساق تىندەرى زاقىمدانعان، كۇيىك شالعان، ءارتۇرلى گەنەزدەگى جارالار، جاندىكتەر شاققان تاعى دا باسقا جاراقات العان بالالارعا كومەك كورسەتىلەدى. جاراقات پۋنكتى اشىلعان ءبىر جارىم جىل ىشىندە دارىگەرلەر 3504 بالاعا مەديسينالىق كومەك كورسەتتى»، - دەدى باس دارىگەر.
ەستەرىڭىزگە سالا كەتسەك، كوپسالالى وبلىستىق بالالار اۋرۋحاناسىندا 2021 جىلدىڭ قاڭتار ايىنان باستاپ 55 توسەك-ورىندىق جاراقات ءبولىمى اشىلدى. جاراقات بولىمىندە تراۆماتولوگيالىق، نەيروحيرۋرگيالىق، ورتوپەديالىق، وفتالمولوگيالىق كومەك كورسەتىلەدى.