الماتى وبلىسىندا مۇگەدەكتىگى بار بالالاردى بەيىمدەۋ ورتالىعى اشىلدى

ورتالىق تالعار اۋدانىندا ورنالاسقان.

الماتى وبلىسىندا رەسپۋبليكالىق «Zhas Project» جوباسى اياسىندا مۇگەدەكتىگى بار بالالاردى بەيىمدەۋ ورتالىعى جۇمىسىن باستادى، دەپ حابارلايدى Almaty-akshamy.kz قازاقپاراتقا سىلتەمە جاساپ.  

ازاماتتىق باستامالاردى قولداۋ ورتالىعىنىڭ باسپا ءسوز قىزمەتىنىڭ مالىمەتى بويىنشا، مۇمكىندىگى شەكتەۋلى بالالار مەن جاستاردى بەيىمدەۋگە ارنالعان دەنە شىنىقتىرۋ-ساۋىقتىرۋ ورتالىعى الماتى وبلىسىنىڭ تالعار اۋدانىندا ورنالاسقان. ونى بۇرىنعى سپورتشى اناستاسيا رياپولوۆا گرانت اياسىندا اشتى.

«سپورتپەن كاسىبي تۇرعىدا 10 جىل بويى اينالىسىپ كەلەمىن. 2 توپتاعى مۇگەدەك بولا تۇرا، مەن بەيىمدەۋ سپورتى ادامداردىڭ الدىندا جاڭا مۇمكىندىكتەردى اشاتىنىنا، توزىمدىلىككە، ومىردەن ءلاززات الۋعا، قورقىنىش پەن ۇياڭدىلىقتى جەڭۋگە ۇيرەتەتىنىنە كوز جەتكىزدىم»، - دەيدى اناستاسيا رياپولوۆا.

ايتا كەتسەك، «Zhas Project» جوباسى الەۋمەتتىك وسال توپتارداعى جاستاردى ناتيجەلى جۇمىسپەن قامتۋعا تارتۋعا، سونداي-اق جەرگىلىكتى جەرلەردە بيزنەس-يدەيالاردى قولداۋعا باعىتتالعان. ول اقپارات جانە قوعامدىق دامۋ مينيسترلىگىنىڭ جانە ازاماتتىق باستامالاردى قولداۋ ورتالىعىنىڭ قولداۋىمەن جۇزەگە اسىرىلادى. وسىلايشا، الماتى، جەتىسۋ، قاراعاندى، ماڭعىستاۋ، تۇركىستان جانە ۇلىتاۋ وبلىستارىندا 252 باستاماشىل توپ 1 ملن تەڭگەگە دەيىنگى گرانتقا يە بولىپ، ءوز يدەيالارىن ىسكە قوسۋعا كىرىستى. گرانتتىق جوبانىڭ 25ء-سىن الماتى وبلىسىنىڭ جاستارى، 38ء-ىن جەتىسۋ وبلىسىنىڭ جاستارى جۇزەگە اسىرىپ جاتىر.