قۋاندىق سانجار ەسىمدى وقۋشى 2024-2025 وقۋ جىلىنىڭ تۇلەكتەرى اراسىندا ەڭ جوعارى 140 بالل جيناپ، ۇزدىك ناتيجە كورسەتتى.
بۇل تۋرالى الماتى وبلىسى اكىمىنىڭ باسپا ءسوز قىزمەتى حابارلادى.
سانجار قۋاندىق «قازاق ءتىلى مەن ادەبيەتى» پاندەرى بويىنشا ۇلتتىق ءبىرىڭعاي تەستىلەۋ تاپسىرىپ، ەڭ جوعارى ناتيجەگە قول جەتكىزدى. تەستىلەۋدەن شىققان كەزدە ونى دوستارى قۋانىشپەن قارسى الىپ، بۇل ءساتتىڭ ۆيدەوسى جەلىدە تارادى.
«تاپسىرمالاردى ورىنداۋعا شامامەن ءۇش ساعات ۋاقىتىم كەتتى. قالعان 40 مينۋتتى تەك دۇعا جاساپ وتكىزدىم. ناتيجەسىندە 140 بالل جينادىم. مينيمۋم 139 بالل جينايمىن نەمەسە رەكورد ورناتىپ، ماكسيمالدى بالل الامىن دەپ ۇمىتتەندىم»، — دەيدى سانجار.
الماتى وبلىسىنىڭ ءبىلىم باسقارماسىنىڭ مالىمەتىنشە، سانجار ەڭبەكشىقازاق اۋدانىنىڭ تولقىن ورتا مەكتەبىندە وقيدى. قازىرگى ۋاقىتتا ول الماتى وبلىسىنداعى تەستىلەۋدەن ەڭ جوعارى بالل جيناعان جالعىز وقۋشى.