بالالار تاربيەشى "جۇڭگو كەسپەسىن" بەرگەنىن ايتقان
الماتى وبلىسىندا ءتورت وقۋشى استان ۋلانىپ، اۋرۋحاناعا ءتۇستى. ولار - ۇزىناعاشتاعى "ساۋرىق" قايىرىمدىلىق مەكەمەسىندە تۇراتىن از قامتىلعان وتباسىدان شىققان بالالار. 14 جاستاعى جاسوسپىرىمدەر دارىگەرلەرگە تاربيەشى تەز دايىندالاتىن كەسپەنى بەرگەنىن ايتقان، دەپ حابارلايدى Almaty-akshamy.kz.
ءتورت بالا جامبىل اۋدانى اۋرۋحاناسىنا كەشە 08:00 شاماسىندا جەتكىزىلگەن. ءبارى بىردەي استان ۋلانعان. ولار تاربيەشى "جۇڭگو كەسپەسىن" بەرگەنىن ايتقان.
"بالالار "كەشكى استا وزدەرى بەردى" دەپ ايتتى. ولار باسى اۋىرىپ، ءىشى ءوتىپ، ءالسىز بولىپ، قۇسقانىنا شاعىمداندى. بالالارعا جەدەل كومەك كورسەتىلىپ، جۇقپالى اۋرۋلار بولىمىنە جاتقىزىلدى. ەمدەۋ دارىگەرى حابارلاسقاندا، بالالاردى ەشكىم ىزدەپ كەلگەن جوق. جەتەكشىسى، اتا-انالارى كەلگەن جوق دەدى"، - دەيدى جامبىل اۋدانى اۋرۋحاناسى باس دارىگەرىنىڭ ورىنباسارى كۇلزادا ارىنوۆا.
ال مەكەمە باسشىسى كەسپەنى بالالار "وزدەرى اكەلگەنىن" ايتقان. ءقازىر بۇل جاعدايعا قاتىستى تەكسەرۋ باستالعان.
"ولار ءوزى نە اكەلىپ جەگەن ەكەن، حابارىمىز دا بولعان جوق، سوسىن تاڭەرتەڭ اۋىرىپ تۇرمىز دەگەننەن كەيىن "جەدەل جاردەم" شاقىرىپ جىبەرگەن ەدىك. اتا-انالارىنىڭ حابارى بار، ءبىز مىنا جەردە سەنىمحاتپەن العاننان كەيىن، بۇكىل دارى-دارمەگى، قاراجات جاعىنان بولسىن، ءبارىن اپارىپ، ءوزىمىز كومەكتەسىپ جاتىرمىز"، -دەدى "ساۋرىق" قايىرىمدىلىق مەكەمەسىنىڭ ديرەكتورى قۇسايىن قاسىمبەكوۆ.
كتك تەلەارناسىنىڭ حابارلاۋىنشا، وقۋشىلاردىڭ جاتىن بولمەسىنىڭ قابىرعاسى كوگەرگەن، بولمە سالقىن. جەرگىلىكتى تۇرعىنداردىڭ ءبىرى بۇل قايىرىمدىلىق مەكەمەسىندە ۇلدارعا تەرىس باعىتتا ءدىني ۋاعىز ايتىلادى دەپ وتىر.
اۋدان اكىمدىگى ورتالىقتىڭ رەسمي تىركەلگەنىن، دەگەنمەن كەيىنگى جاعدايعا بايلانىستى قوسىمشا تەكسەرىس جۇرگىزىلەتىنىن مالىمدەگەن.
"ءوزىمىزدىڭ تاراپىمىزدان، ءدىني باسقارمادان، تەولوگ تاراپىنان جانە قوسىمشا تەكسەرەمىز. سانيتارلىق-ەپيدەميولوگيالىق دەپارتامەنت تاراپىنان باقىلاۋعا الىپ، وسى جۇمىستاردىڭ الدىن الۋ، بولاشاقتا بولماۋى ءۇشىن، وسى ماسەلەنى ءبارىن باقىلاۋعا الامىز"، - دەيدى جامبىل اۋدانى اكىمىنىڭ ورىنباسارى ادىلبەك قامبار ۇلى.
ۋلانعان ءتورت بالا جۇقپالى اۋرۋلار بولىمشەسىندە جاتىر. ءۇش كۇندە شىعۋى مۇمكىن. ال تەكسەرۋ قورىتىندىسى بويىنشا "ساۋرىق" مەكەمەسىندە ۋلانعانى راستالسا، باسشىلىعى زاڭ جۇزىندە جاۋاپقا تارتىلادى.