الماتى وبلىسىنىڭ پوليسەيلەرى مال ۇرىسىن قۇرىقتادى
8 اقپان اقسۋ ءاپب-نىڭ كەزەكشى بولىمىنە الماتى قالاسى، الاتاۋ اۋدانىنىڭ 56 جاستاعى تۇرعىنى اقسۋ اۋدانى، جاڭالىق اۋىلىنا قاراستى شارۋا قوجالىقتان 24 باس جىلقى مالىنىڭ ۇرلانىپ، ماتەريالدىق شىعىن كەلگەنى تۋرالى ارىزدانعان، دەپ حابارلايدى Almaty-akshamy.kz Polisia.kz-كە سىلتەمە جاساپ.
اتالعان دەرەك ق ر قك-نىڭ 188-1 بابى 4-بولىگى 2-تارماعى بويىنشا (مال ۇرلىعى) تىركەلىپ، ۇرلانعان مالدى ىزدەستىرۋ جۇمىستارى باستالدى. ىزدەستىرۋ ءىس-شارالارىنا اقسۋ ءاپب-نىڭ قىزمەتكەرلەرى جۇمىلدىرىلدى.
«جۇرگىزىلگەن ىزدەستىرۋ شارالارىنىڭ ارقاسىندا جوعالعان جىلقىلار سارقان اۋدانىنىڭ اۋماعىندا ورنالاسقان جەكە شارۋا قوجالىعىنان تابىلىپ، زاڭدى يەسىنە قايتارىلدى. مال ۇرلىعى دەرەگىنە قاتىسى بار دەگەن كۇدىكپەن 34 جاستاعى سارقان قالاسىنىڭ د. ەسىمدى تۇرعىنى ۇستالىپ، اقسۋ اۋدانىنىڭ سوتىنىڭ قاۋلىسىمەن تەرگەۋ امالدارى اياقتالعانشا ەكى اي مەرزىمگە ۋاقىتشا ۇستاۋ يزولياتورىنا قامالدى»، – دەپ حابارلايدى اقسۋ ءاپب-نىڭ باستىعى داۋرەن ساكەنوۆ.