ونىڭ ىشىندە 13 مال قاعۋ دەرەگى انىقتالعان
الماتى وبلىسىندا جىل باسىنان بەرى 1113 جول كولىك وقيعاسى بولىپ، 210 ادام قازا تاپقان. ونىڭ ىشىندە 13 مال قاعۋ دەرەگى تىركەلىپ، 20 ادام جاراقات العان، دەپ حابارلايدى Almaty-akshamy.kz Almaty.tv-گە سىلتەمە جاساپ.
رەسپۋبليكالىق ماڭىزى بار تاسجولدا جانە قالاعا قاتىنايتىن ءىرى جول جيەگىندە قاراۋسىز جايىلىپ جۇرگەن ءىرى-قارانىڭ دا سانى ارتتى، - دەيدى پوليسيا قىزمەتكەرلەرى. ال جۇرگىزۋشىلەر جول اپاتىنا سەبەپ بولعان مال يەلەرىن جاۋاپقا تارتۋ كەرەك دەپ وتىر.
جىلقىسى جول جيەگىندە قاراۋسىز جۇرسە دە، جاۋاپكەرشىلىكتەن قاشپاق بولعان مال يەلەرى كىناسىن بىردەن مويىنداي قويمادى. تەك بەينەكامەرادان كورىپ، ءۇنسىز كونۋگە ءماجبۇر بولدى. ارينە، زاڭ بارىنە ورتاق.
«قاراۋسىز جۇرگەن ءتورت تۇلىك جولعا شىعىپ كەتۋى مۇمكىن. وسىنداي جاعداي ورىن الماس ءۇشىن مال باعاتىن ادامداردى قاتاڭ باقىلاۋعا الىپ، ايىپپۇل سالۋ كەرەك»، – دەدى كولىك جۇرگىزۋشىسى الىبەك قاليمولدين.
«بۇل جەردە دە سيىرلار مەن جىلقىلار كوپ جۇرەدى. سوندىقتان مال باعاتىندار، مالىن قاراۋسىز قالدىرماۋ كەرەك»، – دەدى كولىك جۇرگىزۋشىسى داۋرەنبەك قانالييەۆ.
الايدا مال يەلەرى بۇل ايماقتا جايىلىم جەرلەردىڭ جوقتىعىن اتاپ ءوتتى. سوندىقتان امالسىز جول جيەگىمەن ايداپ وتەتىندەرىن العا تارتادى. ءبىراق قاراۋسىز قالعان ءتورت تۇلىكتىڭ تاسجولعا شىعىپ كەتكەنىن جوققا شىعارمايدى.
«الماتى-بەسمويناق تاسجولىندا جۇرگەن مالداردىڭ يەسىن انىقتاپ، ق ر اكىمشىلىك قۇقىق بۇزۋشىلىق كودەكسىنىڭ 408-بابى 1-بولىگى بويىنشا حاتتاما تولتىرىپ بارىنە اۋىزشا ەسكەرتىپ كەتتىك»، – دەدى قاراساي اۋدانى ءىىب ۋچاسكەلىك پوليسيا ينسپەكتورى ەرنار وڭعاربايەۆ.
بۇگىنگى رەيد جۇمىستارى باراسىندا اكىمشىلىك قۇقىق بۇزعان ون شاقتى ازاماتقا ايىپپۇل سالىنىپ، جول جيەگىمەن مال ايداپ وتكەندەرگە ەسكەرتۋ جاسالدى. سونىمەن قاتار پوليسيا قىزمەتكەرلەرى ارنايى مال ايداپ وتەتىن بەلگىلەر بار جەرلەرمەن، ارنايى وتكەلدەرمەن جولدى كولدەنەڭ كەسىپ وتۋگە رۇقسات بارىن ايتادى.