الدىن الا مالىمەت بويىنشا جول-كولىك وقيعاسىنان 4 بالا، 2 ەرەسەك ادام كوز جۇمعان
13 قازان كەشكى ساعات 17.30 شاماسىندا الماتى وبلىسىنىڭ ەڭبەكشىقازاق اۋدانىندا جول اپاتىنان 6 ادام قازا تاۋىپ، 3 ادام جاراقات الدى، دەپ حابارلايدى Almaty-akshamy.kz.
قايعىلى جاعداي "الماتى - كوكپەك - كوكتال" تاسجولىنىڭ 69-شاقىرىمىندا ورىن العان. 28 جاستاعى Mercedes جۇرگىزۋشىسى قارسى قوزعالىس جولاعىنا شىعىپ، Subaru كولىگىمەن سوقتىعىسقان.
وقيعا ورنىندا Mercedes كولىگىندە بولعان 6 ادام قازا تاپتى، ونىڭ 4-ەۋى – كامەلەتكە تولماعان بالالار.
زارداپ شەككەن تاعى 3 ادام ءارتۇرلى جاراقاتپەن جاقىن ماڭداعى اۋرۋحاناعا جاتقىزىلدى.
ايتا كەتۋ كەرەك، 1992 جىلى شىققان Mercedes-تە 9 ادام بولعان، ونىڭ التاۋى – بالا.
قازىرگى ۋاقىتتا پوليسيا قىزمەتكەرلەرى ءىستىڭ ءمان-جايىن انىقتاپ جاتىر. فاكتى بويىنشا قاجەتتى ساراپتامالار تاعايىندالدى. سوتقا دەيىنگى تەرگەپ-تەكسەرۋ باستالدى.