3،5 مىڭ ادامدى جۇمىسپەن قامتاماسىز ەتۋگە مۇمكىندىك بەرەدى.
الماتى وبلىسىندا قۇس فابريكاسى سالىنادى. كاسىپورىن جىلىنا 120 مىڭ توننا ەت ءونىمىن شىعارماق. فابريكا قۇرىلىسى 2024 جىلى باستالادى، ال I كەزەك 2026 جىلى، II كەزەك 2028 جىلى ىسكە قوسىلادى دەپ جوسپارلانىپ وتىر، دەپ حابارلايدى Almaty-akshamy.kz Baq.kz سىلتەمە جاساپ.
فابريكانىڭ نەگىزىن قالاۋشى سەرىك تولىقپايەۆ قۇس فابريكاسىنىڭ ىسكە قوسىلۋى 3،5 مىڭ ادامدى جۇمىسپەن قامتاماسىز ەتۋگە مۇمكىندىك بەرەتىنىن اتاپ ءوتتى. قۇس ەتىن شىعارۋ ءۇشىن فابريكادا ەۋروپالىق ستاندارتتارعا ساي كەلەتىن جانە ەڭ جاڭا دەگەن قۇرال-جابدىق قولدانىلادى. ال جۇمىرتقادان باستاپ سورەدەگى دايىن ونىمگە دەيىنگى بارلىق كەزەڭدى قامتيتىن قالدىقسىز جانە ەكولوگيالىق ءوندىرىس سيكلى «حالال» ستاندارتارىنا ساي كەلەدى جانە بۇكىل كومپانيا توبى بويىنشا جاسىل تەحنولوگيالاردى بەلسەندى تۇردە دامىتا باستاعان حولدينگتىڭ ەكولوگيانى قولدايتىنىن كورسەتەدى.
«وبلىس بيۋدجەتكە سالىق تولەيتىن جانە جەرگىلىكتى تۇرعىنداردى جۇمىس ورىندارىمەن قامتاماسىز ەتەتىن ءىرى كاسىپورىنعا يە بولادى. جاھاندىق تۇرعىدان الىپ قاراعاندا، «جەتىسۋ» قۇس فابريكاسى يمپورت الماستىرۋعا قاتىسىپ، قازاقستاننىڭ ازىق-تۇلىك قاۋىپسىزدىگىن جانە تاماق يندۋسترياسىن دامىتۋعا ۇلەس قوسادى. سوڭعى ەكى-ۇش جىل ىشىندە ورىن العان الەمدىك وقيعالار ازىق-تۇلىك شىعاراتىن جەرگىلىكتى كاسىپورىنداردىڭ بولعانى جانە حالىقارالىق تاسىمال مەن گەوساياسي جاعدايدان تاۋەلسىز بولۋدىڭ قانشالىق ماڭىزدى ەكەنىن»، – دەدى حولدينگتىڭ نەگىزىن قالاۋشى سەرىك تولىقپايەۆ.
سەرىك تولىقپايەۆ مۇنداي اۋقىمدى جوبالاردىڭ ىسكە قوسىلۋى وبلىستىڭ دا، جالپى مەملەكەتتىڭ دە ەكونوميكاسىنا مۋلتيپليكاتيۆ تۇردە اسەر ەتەتىنىن جەتكىزدى: «ينۆەستيسيالار مەن كاسىپورىن جۇمىسى ايماق دامۋىنا تىكەلەي وڭ ىقپال ەتەدى – حالىق جۇمىسقا ورنالاسادى، جەرگىلىكتى تاۋارلار مەن قىزمەتتەردىڭ جاڭا تۇرلەرى پايدا بولادى، سونىمەن قاتار كولىك تاسىمالى مەن قۇرىلىستان باستاپ كلينينگكە دەيىنگى ءتۇرلى سەرۆيس ۇسىناتىن جاناما سالالار تابىس تابا باستايدى».