قورعانىس ءمينيسترى نۇسقاۋلار بەردى.
دەسانتتىق-شابۋىلداۋ اسكەرلەرىنىڭ بولىمشەلەرى «باتىل تويتارىس – 2022» كەشەندى ۆەدومستۆوارالىق ستراتەگيالىق كوماندالىق-شتابتىق وقۋ-جاتتىعۋىنىڭ نەگىزگى كەزەڭىندە قالالىق جاعدايدا جاۋىنگەرلىك ءىس-قيمىل جۇرگىزۋدىڭ تاكتيكالىق تاسىلدەرىن پىسىقتادى، دەپ حابارلايدى Almaty-akshamy.kz.
ەلدى مەكەندەردە ۇرىس جۇرگىزۋدىڭ ەرەكشەلىگى جەكە قۇرامنىڭ دايارلىق دەڭگەيىنىڭ جوعارى بولۋىن تالاپ ەتەدى. وسىعان بايلانىستى وقۋ-جاتتىعۋ بارىسىندا اسكەرلەر قىزمەتىنىڭ اتالعان باعىتىنا ەرەكشە نازار اۋدارىلدى.
«وقۋ-جاتتىعۋدىڭ جوسپارى بويىنشا بارلاۋ، ارتيللەريالىق، ينجەنەرلىك-ساپەرلىك بولىمشەلەردىڭ جانە ۇشقىشسىز باسقارىلاتىن قۇرىلعىلاردىڭ ەسەپتوپتارىمەن كۇشەيتىلگەن دەسانتتىق-شابۋىلداۋ باتالونى قۇرامىنداعى باتالوندىق تاكتيكالىق توپ ارنايى وپەراسيالار كۇشتەرى مەن ۇلتتىق ۇلاننىڭ اسكەري قىزمەتشىلەرىمەن بىرگە ءىس-قيمىل جاساي وتىرىپ، باندالىق توپتار باسىپ العان ەلدىمەكەندى ازات ەتۋ تاپسىرماسىن ورىندادى»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
اۋماقتى بارلاعاننان كەيىن دەسانتشىلار ارميا اۆياسياسىنداعى تىكۇشاقتار توبىنىڭ كومەگىمەن شارتتى قارسىلاستى اينالىپ ءوتىپ، وعان وق جاۋدىردى.
ينجەنەرلىك-ساپەرلىك بولىمشەلەر عيماراتتاردا كىرەتىن جولدى، ازات ەتىلگەن نىسانداردى مينادان تازارتىپ، نەگىزگى كۇشتەردىڭ العا جىلجۋىن قامتاماسىز ەتتى.
بارلىق عيماراتتاردى العان سوڭ ۇلتتىق ۇلان بولىمشەلەرى جۇمىسقا كىرىستى: ولار ەلدى مەكەندى تازارتىپ، قوعامدىق ءتارتىپتى ساقتاۋ شارالارىن ۇيىمداستىردى.
وقۋ-جاتتىعۋدىڭ بەلسەندى كەزەڭىنە قاتىسقان قازاقستان رەسپۋبليكاسىنىڭ قورعانىس ءمينيسترى، گەنەرال-لەيتەنانت رۋسلان جاقسىلىقوۆ اسكەري قىزمەتشىلەردىڭ دايارلىق دەڭگەيىن باعالاپ، وقۋ-جاۋىنگەرلىك تاپسىرمالاردى بىرلەسىپ ورىنداۋ بارىسىندا كۇشتىك قۇرىلىمداردىڭ ءوزارا ءىس-قيمىلىن قولداۋ جونىندە نۇسقاۋلار بەردى.
«باتىل تويتارىس – 2022» ۆەدومستۆوارالىق ستراتەگيالىق كوماندالىق شتابتىق وقۋ-جاتتىعۋى ەل پرەزيدەنتى – قارۋلى كۇشتەردىڭ جوعارعى باس قولباسشىسى قاسىم-جومارت توقايەۆتىڭ كۇشتىك قۇرىلىمداردى ءتيىمدى ۇيلەستىرۋدى قامتاماسىز ەتۋ، ولاردىڭ جەدەل جانە اسكەري-تەحنيكالىق ۇيلەسىمدىلىگىن جولعا قويۋ، سونداي-اق ۆەدومستۆوارالىق ۇيلەستىرۋدى كۇشەيتۋ جونىندەگى تاپسىرمالارىن ىسكە اسىرۋ اياسىندا وتكىزىلىپ جاتقانىن ەستەرىڭىزگە سالا كەتەيىك، - دەلىنگەن حابارلامادا.
