بۇل وڭىردە بالىق وسىرەتىن 22 شارۋاشىلىق بار.
الماتى وبلىسىنداعى كاسىپكەرلەر بالىق شارۋاشىلىعىن دامىتۋدى كوزدەپ وتىر. ولار جىلدىڭ سوڭىنا قاراي سەگىز مىڭ توننا دەيىن بالىق ءوسىرۋدى جوسپارلاپ جاتىر، دەپ حابارلايدى Almaty-akshamy.kz
«وتكەن جىلى الماتى وبلىسىندا 6 مىڭ توننا جۋىق تاۋارلى بالىق وسىرىلسە، بيىل ونىڭ كولەمىن 8 مىڭ تونناعا جەتكىزۋ جوسپارلانۋدا. سونداي-اق، ارال بەكىرەسى قولدان وسىرىلەتىن بولادى»، - دەلىنگەن ەكولوگيا مينيسترلىگىنىڭ باسپا ءسوز قىزمەتىنىڭ حابارلاماسىندا.
الماتى وبلىسىندا بالىق وسىرەتىن 22 شارۋاشىلىق بار. سولاردىڭ ءبىرى - مارلەن ءتۇرسىنالى. بىلتىر كاسىپكەر 50 توننا تاۋارلى باقتاق بالىعىن وسىرسە، بيىل 160 تونناعا كوبەيتپەك. ويتكەنى ءقازىر ءوڭىردىڭ ەڭبەكشىقازاق اۋدانى ەسىك قالاسىندا بالىق وسىرەتىن توعانداردى سالىپ جاتىر. الداعى ەكى ايدا قۇرىلىس جۇمىستارى اياقتالاتىنىن ايتادى.
«جىلىنا 220 توننا فورەل بالىعىن، 50 توننا بەكىرە بالىعىن، 100 توننا افريكالىق (كلاريۆي دەيتىن) سوم بالىعىن وسىرەمىز. شارۋاشىلىقتارىمىزدا 50-گە جۋىق ادام ەڭبەك ەتەدى. وزدەرىڭىز كورگەن جەردى ينۆەستيسيالىق جوبامەن الدىق. الداعى ەكى ايدا قۇرىلىس جۇمىستارى تولىقتاي اياقتالادى. سول كەزدە قۋاتتىلىعى 120 توننا بولاتىن سۋ توعاندارىندا قوسىمشا تاعى دا باقتاق بالىعىن وسىرەمىز. ءارى قاراي ىشكى نارىققا ساتىلىمعا شىعارامىز»، - دەيدى كاسىپكەر مارلەن ءتۇرسىنالى.
سونىمەن قاتار، شەلەك توعان شارۋاشىلىعىندا وسى جىلدىڭ ساۋىرىنەن باستاپ وبلىستا ارال بەكىرەسى وسىرىلەتىن بولادى. ەسكە سالساق، بۇل سۋ مارجانى 1996 جىلى ەرەكشە قورعاۋعا الىنىپ، قازاقستاننىڭ «قىزىل كىتابىنا» ەنگىزىلدى. الايدا، ارال-سىرداريا سۋ باسسەيىندە بۇل بالىق ءتۇرى جويىلىپ كەتكەن. ءبىراق، جەرسىندىرىلگەن بالقاش-ىلە سۋ باسسەيىنەن اۋلانادى. ءسويتىپ، شارۋاشىلىقتا ونى قولدان ءارى قاراي وسىرۋگە بەيىمدەپ، ۋىلدىرىعى مەن شاباعىن تابيعي ورتاعا قايتادان جىبەرەدى. ءقازىر وعان رۇقسات الۋى ءۇشىن سالا كوميتەتى وسى ايدىڭ اياعىنا دەيىن قاۋلى شىعارۋدى جوسپارلاۋدا.
«ءبىز ءتۇرلى ساراپتامادان ءوتىپ، اۋلاۋعا رۇقسات الۋى ءۇشىن بيولوگيالىق نەگىزدەمەنى بالىق شارۋاشىلىعى كوميتەتىنە جىبەردىك. قاۋلى شىققان سوڭ ءساۋىر ايىندا تابيعي ورتادان اۋلاپ، قولدا وسىرۋگە بيىمدەيمىز. ەرەسەك انالىقتاردىڭ ۋىلدىرىعىنان شاباقتاردى شىعارىپ، قايتادان تابيعي ورتاعا جىبەرەمىز. بۇل ءوز كەزەگىندە جويىلىپ بارا جاتقان باعالى بالىق ءتۇرىن ساقتاپ قالۋعا سەپ بولادى»، - دەيدى شارۋاشىلىق ديرەكتورىنىڭ ورىنباسارى مەيرامبەك پازىلبەكوۆ.
الماتى وبلىسى وزگە وڭىرلەرگە قاراعاندا بالىق وسىرۋگە الەۋەتى جوعارى. سوندىقتان بولار قولدان وسىرەمىن دەگەن نيەت بىلدىرۋشىلەر كوپ. ولارعا مەملەكەت تاراپىنان قولداۋ دا از ەمەس.
«الماتى وبلىسىندا سۋ جانە جاساندى سۋلار كوپ، تابيعي كولدەر دە بارشىلىق. بيىل سول تابيعي كولدەردى بالىق ءوسىرۋ ءۇشىن بەكىتىپ، جىلدىڭ سوڭىنا قاراي 8 مىڭ توننا دەيىن بالىق وسىرۋگە جوسپارىمىز بار. وتكەن جىلى الماتى وبلىسىنىڭ بيۋدجەتىنەن تاۋارلىق بالىق ءوسىرۋدى سۋبسيديالاۋعا 32،1 ملن تەڭگە قاراجات ءبولىندى، ونىڭ 16،2 ملن تەڭگەسى يگەرىلدى. قالعان 15،8 ملن تەڭگە ءوتىنىش تۇسپەگەندىكتەن بيۋدجەتكە كەرى قايتارىلدى. بيىل وبلىس بيۋدجەتىنەن تاۋارلىق بالىق ءوسىرۋدى سۋبسيديالاۋعا 38،0 ملن تەڭگە ءبولۋ جوسپارلانۋدا»، - دەيدى بالقاش-الاكول وبلىسارالىق باسسەيندىك بالىق شارۋاشىلىعى ينسپەكسياسى باسشىسىنىڭ ورىنباسارى رينات كۋماشيەۆ.
ايتا كەتۋ قاجەت، وتكەن جىلى ق ر ۇكىمەتىنىڭ قاۋلىسىمەن بالىق شارۋاشىلىعىن دامىتۋدىڭ 2021-2030 جىلدارعا ارنالعان باعدارلاماسى بەكىتىلدى. وندا اتالعان جىلدار ارالىعىندا قولدان وسىرىلگەن سۋ مارجاندارىنىڭ كولەمىن 270 مىڭ تونناعا دەيىن ۇلعايتۋ كوزدەلگەن.