جاعدايدى زاۋىتتىڭ باسشىسى دا ءتۇسىندىرىپ بەرە المادى
«تەرى زاۋىتى تۇرمىسىمىزعا كەدەرگى كەلتىردى». وسىلاي دەگەن الماتى وبلىسى ەڭبەكشى اۋىلىنىڭ تۇرعىندارى اۋىل ىشىندەگى «تەرى زاۋىتىنان شىققان ءيىس قولقانى قابادى» دەيدى. ءتىپتى، ەلدىمەكەندى تۇگەل جايلاپ كەتكەن. اۋلاسىندا اپپاق قۇرت ءورىپ جۇرگەن ءوندىرىس ورتالىعىنا بۇگىن تۇتاس اۋىل كەلىپ، زاۋىتتىڭ جابىلۋىن تالاپ ەتتى. جاعىمسىز ءيىس شىققان نىسانعا تۇرعىندار بۇعان دەيىن دە شاعىم ايتىپ كەلگەن. الايدا اۋاسى بۇزىلىپ القىمنان العاندا امالسىز باس كوتەرۋگە ءماجبۇر بولعان، دەپ حابارلايدى Almaty-akshamy.kz الماتى ارناسىنا سىلتەمە جاساپ.
«ءبىز بالالارىمىزدىڭ دەنساۋلىعىن ويلاۋىمىز كەرەك قوي، اينالايىن. سەندەردە دە وتباسى، بالا بار شىعار»، – دەدى ەڭبەكشى اۋىلىنىڭ تۇرعىنى الما قوجاقۇلييەۆا.
بۇقارا بازىناسىن ايتقان جەردىڭ اۋماعىن ءبىر كۇندە ارالاپ ءبىتىرۋ مۇمكىن ەمەس. زاۋىتقا جولاي كەتسەڭ شىركەي شاعىپ، شىرىگەن ءيىس قولقانى قابادى. ال زاۋىتتىڭ تۇپكى ماقساتى – تەرىنى يلەپ، مالعا جەم جاساۋ. جالدانىپ جۇمىس ىستەيتىن 9 جۇمىسشى ءقازىر اۋلانى جيناپ الەك.
بۇل ءار جەردە ءۇيىلىپ جاتقان شومەلە ەمەس، قولاڭسا ءيىسى قولقانى العان قىرىق مىڭ تەرىنىڭ ءبىر بولىگى عانا. مۇنداعى جۇمىسشىلاردىڭ ايتۋىنشا، تەرىنى قوقىستان، قالابەردى قورادان جيناپ اكەلگەن. ال جاعىمسىز ءيىستىڭ جايلاپ كەتۋىن زاۋىتتىڭ باسشىسى دا ءتۇسىندىرىپ بەرە المادى.
«ءبارىن ءبىز قىس بويى جينادىق. جاڭبىر جاۋعاندا، كۇن جىلىعاندا ءيىس شىعادى. ءبىراق ۆەتەرينار ينسپەكسياسى بار، ولار دەزينفەكسيا جاسايدى. بۇكىل تەرى تەك قويمانىڭ ىشىندە ساقتالادى. ءبارىن تۇسىنەمىن، بىزدە قاتەلىك كوپ»، – دەدى تەرى زاۋىتىنىڭ باسشىسى ەرزات راقىمجانوۆ.
تۇرعىندار «جاۋاپتىلار مۇلدە تەكسەرىس جۇرگىزبەيدى، ءتىپتى نەگىزگى جەر تەلىمىن بەرگەن مەكەمەنى دە جاۋاپقا تارتۋ كەرەك» دەپ وتىر. ويتكەنى اۋىل ىشىنەن جۇمىس باستاۋ ءۇشىن جەرگىلىكتى حالىقپەن ەشكىم كەڭەسپەپتى.
«نارحوز دەيمىز عوي، الماتى قالاسىنداعى ۋنيۆەرسيتەتتىڭ جەرى ەكەن. حالىققا قيانات ىستەپ جاتىر»، – دەدى ەڭبەكشى اۋىلىنىڭ تۇرعىنى رەنات قۇرسابايەۆ.
ال اۋىل بيلىگى ماسەلەدەن حاباردار. ءبىراق ناقتى زاۋىتتىڭ جۇمىسىنا توسقاۋىل قويا المايتىن ولار ءتيىستى تاراپتارعا ارىز جازعانىن جەتكىزدى.
«جۇمىسى تالاپقا ساي ەمەس. سول سەبەپتى دەزينفەكسيا جاساۋ كەرەگىن ايتىپ، «باتۋ-اگرو» جشس-عا ەسكەرتۋ بەرىلدى. بۇل جەر نارحوزدىڭ فيليالىنا تيەسىلى، ولار كەلىسىمشارتقا وتىرعان»، – دەدى ايتەي اۋىلدىق وكرۋگى اكىمىنىڭ ورىنباسارى اكىمجان ءجۇنىسوۆ.
ال كوپشىلىك جەردىڭ يەسى دەگەن رىسقۇلوۆ اتىنداعى وقۋ ورنىنىڭ ماماندارى ماردىمدى جاۋاپ بەرگەن جوق. رەسمي حاتقا عانا جاۋاپ بەرەتىنىن ايتتى. ال اۋىل ارىزىن ايتقان ءوندىرىس ورتالىعىنا ەندى سانيتارلىق باقىلاۋ مەكەمەسى تەكسەرىس جۇرگىزەدى.