قۇتقارۋشىلار 112 قىزمەتىنەن كەلەتىن سمس حابارلامالاردى نازاردان تىس قالدىرماۋدى سۇرايدى.
الماتى وبلىسىندا اۋا رايىنىڭ قولايسىزدىعىنا بايلانىستى بىرنەشە باعىتتاعى جولدار جابىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«2022 جىلدىڭ 15 اقپاندا الماتى وبلىسىنىڭ «جولاۋشىلار كولىگى جانە اۆتوموبيل جولدارى باسقارماسىنىڭ» حابارلاۋىنشا، اۋا رايىنىڭ ناشارلاۋىنا بايلانىستى (بوران، نولدىك كورىنۋ) وبلىستىق ماڭىزى بار اۆتوجول ۋچاسكەسىندە ساعات 09:00-دەن باستاپ «الماتى-وسكەمەن – قاپال-اراسان» 0-45 شاقىرىمىندا دەيىن بارلىق اۆتوكولىك تۇرلەرى ءۇشىن قوزعالىس جابىلدى»، - دەلىنگەن الماتى وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتىنىڭ حابارلاماسىندا.
سونداي-اق قاپال اۋىلىندا 0-16 شاقىرىم جول جابىق.
«اۋا رايىنىڭ قولايسىزدىعىنا بايلانىستى تاڭعى ساعات 04.00-دەن باستاپ «سارىوزەك-كوكتال-قوعالى-كوكسۋ-قارابۇلاق» 0-94 شاقىرىمى جابىلىپ، ارالتوبە، ونجاس، قاسپان، قارىمساق جانە مايتوبە اۋىلدارىنا اۆتوكولىكتەر كىرە المايدى. سونداي-اق، «قازاۆتوجول» ۇك اق الماتى وبلىستىق فيليالى مەن «قازاقاۆتوجول» ج ش س الماتى وبلىستىق فيليالىنىڭ حابارلاماسى بويىنشا 11 ساعات 10 مينۋتتان باستاپ اۋا رايىنا جانە شقو اۆتوجولدارىنىڭ جابىلۋىنا بايلانىستى (بوران، كورىنۋدى شەكتەۋ) جول قوزعالىسى قاۋىپسىزدىگىنە قاتەر ءتونۋى، اۆتوكولىكتىڭ بارلىق تۇرلەرى ءۇشىن «الماتى-وسكەمەن» رەسپۋبليكالىق ماڭىزى بار اۆتوجولىندا (ءۇشارال قالاسى-شقو شەكاراسى، 558-615 شاقىرىمدارى) قوزعالىس جابىلدى»، - دەپ تولىقتىردى اتالعان ۆەدومستۆونىڭ باسپا ءسوز قىزمەتى.
الماتى وبلىسىنىڭ تجد ازاماتتاردان وسى باعىتتا جول جۇرۋدەن باس تارتۋدى جانە 112 قىزمەتىنەن كەلەتىن سمس حابارلامالاردى نازاردان تىس قالدىرماۋدى سۇرايدى.
ۇزاق جولعا شىققان كەزدە اۋا رايىن تەكسەرىپ، توتەنشە جاعدايلاردا سىزگە كومەكتەسەتىن بارلىق قاجەتتى زاتتاردى وزىڭىزبەن بىرگە الىڭىز. ايتا كەتسەك، دانەكەرلەۋ شامى، ارقان، دوڭگەلەكتەرگە ارنالعان تىزبەكتەر، كۇرەكتەر، پارافين شامدارى، سونداي-اق جىلى كيىم، قاجەتتى قۇرال-جابدىقتار، تاماق پەن سۋ. ەگەر ءسىز بوران نەمەسە قاتتى اياز كەزىندە جولدا بولساڭىز، ەگەر ءسىزدىڭ كولىگىڭىز ەلدى مەكەننەن الىس جەردە نەمەسە سىزگە تانىس ەمەس جەردە توقتاپ قالسا، كولىك ىشىندە قالىپ، جولدا ءوتىپ بارا جاتقان باسقا كولىكتەردىڭ ءجۇرۋىن كۇتىپ نەمەسە ۇيالى تەلەفون ارقىلى «101» جانە «112» تەلەفون نومەرلەرى بويىنشا كومەك شاقىرعان دۇرىس.
اۋا رايىنا بايلانىستى ەسكەرتۋلەر مەن وزگە دە شۇعىل اقپارات الۋ ءۇشىن «دارمەن» تەگىن ءموبيلدى قوسىمشاسىن جۇكتەۋگە بولادى.