اكەلەر كەڭەسى كەيبىر جاۋاپسىز اكەلەردىڭ اليمەنت تولەمەۋى، از قامتىلعان وتباسىلارعا كومەك كورسەتۋ، قيىندىققا تاپ بولعان اكەلەر ماسەلەسىن شەشۋگە باسا نازار اۋداراتىن بولادى.
الماتى وبلىسىندا تۇڭعىش رەت اكەلەر كەڭەسى قۇرىلدى، - دەپ حابارلايدى Almaty-akshamy.kz
بۇل تۋرالى حابارلاعان قازاقپاراتتىڭ اقپاراتىنا سايكەس، الماتى وبلىسىنىڭ جاستار ساياساتى ماسەلەلەرى باسقارماسى، وبلىستىق جاستار رەسۋرستىق ورتالىعىنىڭ ۇيىمداستىرۋىمەن جاس ۇرپاقتى تاربيەلەۋ ىسىندەگى اكەلەردىڭ مارتەبەسى جانە جاۋاپكەرشىلىگىن جوعارىلاتۋ، وتباسىلىق قۇندىلىقتاردى دامىتۋ جانە نىعايتۋ ماقساتىندا «اكە – وتباسىنىڭ تىرەگى» اتتى وبلىستىق اكەلەر فورۋمى ءوتتى.
جيىنعا وتباسىندا، بالا تاربيەسىندە ءوز جاۋاپكەرشىلىگىن سەزىنگەن بەلسەندى ءارى ءتۇرلى سالا قىزمەتتەرىندە ۇلگى كورسەتىپ جۇرگەن، ۇرپاعىنا سانالى تاربيە بەرىپ، كوپكە ۇلگى بولىپ وتىرعان، كوپبالالى اكەلەرمەن قاتار، جاس اكەلەر دە قاتىستى. فورۋم اياسىندا ولار ءتۇرلى ترەنينگتەرگە قاتىسىپ، ءوزارا تاجىريبە الماستى. بۇگىندە وتباسى تاربيەسىندەگى، بالالاردىڭ بويىنا پاتريوتتىق سەزىمدى دارىتىپ، ادامگەرشىلىك قۇندىلىقتاردى قالىپتاستىرۋداعى اكە ءرولىن كوتەرۋ ماسەلەلەرىنە قوعام نازارىن اۋدارۋ قاجەت. وسى ورايدا، فورۋمدا بەلسەندى اكەلەردىڭ باسى قوسىلىپ، الدىڭعى بۋىننىڭ وڭدى تاربيەسىن، اتا-انالار قاۋىمداستىعىنىڭ جۇمىسىن جەتىلدىرۋدەگى وزەكتى سۇراقتاردى تالقىلاۋ سىندى ءبىرقاتار ماسەلەلەرگە توقتالدى.
سونىمەن قاتار، جينالعان قاۋىمنىڭ ورتاق ۇسىنىسىنا سايكەس، تۇڭعىش رەت وبلىستىق اكەلەر كەڭەسى قۇرىلدى. اتالمىش اكەلەر كەڭەسى اكەلىك ينستيتۋتتى ناسيحاتتاۋمەن قاتار، وڭىردە كەيبىر جاۋاپسىز اكەلەردىڭ اليمەنت تولەمەۋى، از قامتىلعان وتباسىلارعا مەكەنجايلىق كومەك كورسەتۋ، ونىڭ ىشىندە الەۋمەتتىك تۇرعىدا قاجىعان، وتباسىن اسىراۋدا قيىندىققا تاپ بولعان اكەلەر ماسەلەسىن شەشۋگە باسا نازار اۋداراتىن بولادى.
اكەلەر كەڭەسىنىڭ وكىلدەرىن جەرگىلىكتى اتقارۋشى ورگاندارىنىڭ جانىنداعى ءارتۇرلى ساراپتامالىق جۇمىس توپتارىنا تارتىلۋى ماڭىزدى. ارقالار جۇگى سالماقتى كەڭەستىڭ ءتوراعاسى رەتىندە الماتى وبلىستىق ءبىلىم جانە عىلىم قىزمەتكەرلەرىنىڭ كاسىپوداق ۇيىمىنىڭ ءتوراعاسى تولەپبەرگەنوۆ مەلس قۇلمۇحان ۇلى سايلاندى.