كوكوزەك اۋىلىندا قىسىمى جوعارى گاز قۇبىرى وتەتىندىكتەن، 137 ءۇي سۇرىلمەك.
سونىڭ كەسىرىنەن 600 ادام دالادا قالۋى مۇمكىن، دەپ حابارلايدى Almaty-akshamy.kz
كوكوزەك اۋىلىندا جاڭا سالىنىپ جاتقان جەكە تۇرعىن ۇيلەر كوپ. جاڭادان كوشىپ كەلگەندەر بۇل جەر تەلىمىنىڭ قىزىل سىزىققا ەنگەنىن جاقىندا بىلگەن. ال زاڭ بويىنشا ونداي اۋماققا قۇرىلىس نىسانى بولماۋى كەرەك.
"الماتى-بايسەركە-تالعار گاز ماگيسترالىنىڭ ەكىنشى تارماعى وتەتىندىكتەن، بۇكىل ءۇيدى سۇرمەك. بۇل جەردە مۇگەدەك وتباسى، جالعىزباستى انالار، كوپ بالالى انالار بار. ەندى 137 ۇيدە 600-دەن اسا تۇرعىن بار، ءبىز قايدا بارامىز؟" – دەدى كوكوزەك اۋىلىنىڭ تۇرعىنى جانار سەيىتقوجايەۆا.
ال بۇل وتباسى ءقازىر پاتەر جالداپ تۇرادى. قار ەرىپ، كۇن جىلىنسا، "ءۇيدىڭ قۇرىلىسىن باستايمىن" دەپ قازىق قاعىپ كەتىپتى. قۇرىلىس ماتەريالدارىن ساتىپ اكەلىپ، تاسىن دا ءتۇسىرىپ قويعان.
"جەلتوقسان ايىندا 6 سوتىق جەردى 1،5 ميلليون تەڭگەگە ساتىپ العانبىز. كوكتەمدە قۇرىلىس جۇمىسىن باستايمىن دەپ ويلاعانمىن"، – دەدى كوكوزەك اۋىلىنىڭ تۇرعىنى مەيرامحان بەكشەتايەۆا.
ال اۋىل اكىمى "تۇرعىندارعا ءبىر جىل بۇرىن ەسكەرتتىك" دەپ سەندىردى. ونىڭ ايتۋىنشا، جوعارى قىسىمدى گاز قۇبىرى وتەتىندىكتەن، ماڭايىندا ءۇي بولماۋى كەرەك.
"قاراساي اۋدانى جەر قاتىناستار ءبولىمى تەندەر بەردى. باعالاۋشىلار وسى ماڭايداعى تۇرعىن ءۇيدىڭ قۇنىن انىقتايدى. سوعان سايكەس شىعىن وتەلەدى. ال كەلىسپەسە، سوت ارقىلى جۇزەگە اسىرىلادى. كەلىسىپ جاتقان وتباسىلار بار، ولاردىڭ سانىن ءقازىر ناقتى ايتا المايمىن. جۇمىس ءجۇرىپ جاتىر"، – دەدى ەلتاي اۋىلدىق وكۋرگىنىڭ اكىمى ءبىرجان ماحاتوۆ.
كوپشىلىكتىڭ ايتۋىنشا، قىزىل سىزىققا ۇيلەردەن بولەك، مەكتەپ پەن دارى-دارمەك شىعاراتىن زاۋىت تا ءتۇسىپ تۇر. ءبىراق اكىمدىك وكىلدەرى مەكتەپتىڭ ءقاۋىپتى ايماقتان الىس جاتقاندىعىن ايتىپ وتىر. ءدارى شىعاراتىن زاۋىتتىڭ دا تەك قوسالقى عيماراتى سۇرىلمەك. ال الاڭداۋلى اۋىل ادامدارىنىڭ تاعدىرى تەندەرگە قاراپ تۇر.