الماتى وبلىسىنىڭ تالعار اۋدانىندا پوليسيا قىزمەتكەرلەرى 41 باس ۇساق مالدى ۇرلادى دەگەن كۇدىكپەن 43 جاستاعى جەرگىلىكتى تۇرعىندى ۇستادى.
تەرگەۋ بارىسىندا كۇدىكتىنىڭ كورشىلەس شارۋا قوجالىعىندا مالشى بولىپ جۇمىس ىستەپ ءجۇرىپ، بۇل قىلمىستى الدىن الا جوسپارلاعانى انىقتالدى، دەپ حابارلايدى aqshamnews.kz Polisia.kz-كە سىلتەمە جاساپ.
– يەلەرىنىڭ ۋاقىتشا بولماعانىن پايدالانعان كۇدىكتى مالدى ۇرلاپ، ولاردى ساتۋعا الدىن الا ساتىپ الۋشىمەن كەلىسىم جاساعان. قىلمىسىن تەزىرەك جۇزەگە اسىرۋ ءۇشىن ول كولىگى بۇزىلعانىن ايتىپ، الداپ، ەگەر ساتىپ الۋشى جانۋارلاردى تاسىمالداۋعا كومەكتەسسە، باعانى تومەندەتۋگە ۋادە بەرگەن. ۇرلانعان مالدىڭ جامبىل اۋدانىنداعى مال بازارىندا ساتىلعانى بەلگىلى بولدى، – دەپ حابارلادى پوليسيا وكىلدەرى.
اتالعان فاكتى بويىنشا قىلمىستىق ءىس قوزعالىپ، كۇدىكتى ۋاقىتشا ۇستاۋ يزولياتورىنا قامالدى. وڭىرلىك پوليسيا دەپارتامەنتى مال يەلەرىن قاۋىپسىزدىك شارالارىن قاتاڭ ساقتاۋعا شاقىرادى. مال جايۋدى تەك سەنىمدى ادامدارعا تاپسىرىپ، جايىلىمداردا تاۋلىك بويى باقىلاۋ ۇيىمداستىرۋدىڭ ماڭىزدىلىعىن اتاپ ءوتتى. سونداي-اق، كەز كەلگەن كۇماندى جاعدايلار تۋىنداعان جاعدايدا دەرەۋ پوليسياعا حابارلاسۋ قاجەتتىگىن ەسكەرتتى.