تجم باسشىسى گەنەرال-لەيتەنانت شىڭعىس ءارىنوۆ الماتى وبلىسىنىڭ كەگەن اۋىلىندا جاڭا ءورت ءسوندىرۋ دەپوسىن اشتى، - دەپ حابارلايدى aqshamnews.kz.
اشىلۋ راسىمىنە الماتى وبلىسىنىڭ اكىمى مارات سۇلتانعازييەۆ، تجد باسشىلىعى، قىزمەت ارداگەرلەرى، سونداي-اق اۋىل تۇرعىندارى قاتىستى. اتالعان نىسان قازاقستان تج مينيسترلىگىنىڭ ستراتەگيالىق جوسپارى اياسىندا جەرگىلىكتى بيۋدجەت قاراجاتى ەسەبىنەن سالىندى.
ءىس-شارا بارىسىندا ءسوز سويلەگەن مينيستر ازاماتتىق قورعاۋ جۇيەسىن نىعايتۋ جانە اۋىلدىق جەرلەردەگى قاۋىپسىزدىك دەڭگەيىن ارتتىرۋ مەملەكەت باسشىسى قويعان باسىم مىندەتتەردىڭ ءبىرى ەكەنىن اتاپ ءوتتى. سونداي-اق شىڭعىس ءارىنوۆ جاڭا ءورت ءسوندىرۋ دەپوسىنىڭ، زاماناۋي ءورت-قۇتقارۋ تەحنيكاسىنىڭ، ونىڭ ىشىندە ءورت اۆتوسيستەرناسىنىڭ، جەدەل-قۇتقارۋ اۆتوكولىگىنىڭ جانە جول تالعامايتىن كولىكتىڭ كىلتتەرىن تابىس ەتتى.
جاڭا ءورت ءسوندىرۋ دەپوسى جالپى سانى 28 مىڭنان استام حالقى بار 12 اۋىلدىق وكرۋگ پەن 34 ەلدى مەكەندى ورتتەن قورعاۋدى قامتاماسىز ەتەدى. عيمارات مودۋلدىك تەحنولوگيا بويىنشا سالىنعان، بۇل قاجەت بولعان جاعدايدا نىساندى جەدەل تۇردە كەڭەيتۋگە جانە جاڭعىرتۋعا مۇمكىندىك بەرەدى. دەپو تاۋلىك بويى قىزمەت اتقارۋعا قاجەتتى بارلىق جاعدايمەن تولىق جابدىقتالعان: زاماناۋي بايلانىس قۇرالدارى بار ديسپەچەرلىك پۋنكت، ەكى ءورت ءسوندىرۋ اۆتوكولىگىنە ارنالعان گاراجدار، سانيتارلىق-تۇرمىستىق ءۇي-جايلار، اس ءۇي جانە دەمالىس بولمەلەرى بار. سونىمەن قاتار سپورتتىق جاتتىعۋ قۇرال-جابدىقتارمەن جاراقتالعان «Batyr Team» جاتتىعۋ ايماعى بار.
ءىس-شارا اياسىندا نىساننىڭ قۇرىلىسىنا جوعارى جاۋاپكەرشىلىكپەن قاتىسىپ، بەلسەندىلىك تانىتقان ازاماتتار تجم ۆەدومستۆولىق ناگرادالارىمەن ماراپاتتالدى. تجم اۋىلدىق ەلدى مەكەندەردەگى ينفراقۇرىلىمدى دامىتۋ، ورتكە قارسى قاۋىپسىزدىك جۇيەسىن نىعايتۋ جانە ەلدەگى حالىقتىڭ قورعالۋ دەڭگەيىن ارتتىرۋ باعىتىنداعى جۇمىسىن جالعاستىرۋدا.