قۇرمانعازى اتىنداعى قازاق ۇلتتىق حالىق اسپاپتار وركەسترى احمەت جۇبانوۆتىڭ 120 جىلدىعىنا ارناپ «عاسىرلار پەرنەسى» اتتى كونسەرت ۇيىمداستىردى، - دەپ حابارلايدى aqshamnews.kz.
كەشتە قازاق ۇلتتىق كاسىبي مۋزىكانىڭ نەگىزىن قالاۋشى، كومپوزيتور، ديريجەر، كورنەكتى عالىم احمەت جۇبانوۆتىڭ قۇندى مۋزىكالىق مۇراسىنان ءتۇرلى شىعارمالار ورىندالدى. كەشتە قازاقستاننىڭ ەڭبەك سىڭىرگەن قايراتكەرى، ءانشى تولقىن زابيروۆا، اباي اتىنداعى وپەرا جانە بالەت تەاترىنىڭ ءسوليسى ايدوس جاباعين، وپەرا ءانشىسى نەماتۋللو زكرۋللايەۆ، كۇيشى ازامات شىناروۆ، قوبىزشى اسەل راقىمجان جانە ا. جۇبانوۆ اتىنداعى دارىندى بالالارعا مەكتەپ ينتەرناتىنىڭ بالالار حورى قاتىستى. وركەسترگە «قۇرمەت» وردەنىنىڭ يەگەرى ابىلاي تىلەپبەرگەن، نۇركەن ءاشىروۆ پەن ەرلان داۋرەنبەكوۆ ديريجەرلىك ەتتى.
كونسەرت بارىسىندا ق ر ۇلتتىق ورتالىق مۋزەيىنە قاراستى احمەت جانە عازيزا جۇبانوۆتاردىڭ مەموريالدىق مۋزەيىندە «ۇلت رۋحىن اسقاقتاتقان تۇلعا» اتتى كورمە ۇيىمداستىرىلدى. ەكسپوزيسيادا احمەت جۇبانوۆتىڭ ءومىر جولى مەن قىزمەتىنە قاتىستى ارحيۆ قۇجاتتارى، سيرەك فوتوسۋرەتتەر، قولجازبالار، نوتالىق ەڭبەكتەر، كىتاپتار، جەكە زاتتارى ۇسىنىلعان.