مەكتەپ ماسەلەسى شەشىلمەگەنىنە 6 جىل بولعان
ءۇش شاقىرىم جەردەگى ءۇش اۋىسىمدى مەكتەپكە بالا تاسىپ قينالعان تۇرعىندار جاڭا وقۋ ورداسىنىڭ ورتالىقتان سالىنۋىنا قارسى، دەپ حابارلايدى Almaty-akshamy.kz Almaty.tv-گە سىلتەمە جاساپ.
التى جىل بويى ايتىلىپ كەلگەن جايتتى اكىم دە بىلەدى. «اۋىل باسشىسى اۋىسا بەرەدى، ال ماسەلە ءالى سول قالپىندا»، - دەيدى كوپشىلىك.
تۇتاس اۋىلدى بىلاي قويعاندا، مەكتەپكە مۇقتاج اۋماقتىڭ وزىندە 300 وقۋشى بار. كورشى وتىرعان ەكى ءۇيدىڭ ۇل-قىزى ەكى ءتۇرلى مەكتەپكە بارادى دەگەن كوپشىلىك 2017-دە ۋادە ەتىلگەن وقۋ ورنى قاشان سالىنادى دەپ نارازى. تالاي تابالدىرىقتى توزدىرعان تۇرعىندارعا بۇعان دەيىن ءبىر عانا جەر جەتپەيدى دەگەن سىلتاۋ ايتىلىپتى.
كوپتىڭ مەكتەپ سالىنسىن دەپ كوكسەگەن ورنى – وسى. 2020 جىلى جەكەمەنشىككە ءوتىپ كەتكەن 15 گەكتار اۋماق ءقازىر وسىلاي بوس جاتىر. ءبىراق ءبىر كەزدەرى جەرگىلىكتى جۇرتقا بۇل ماڭايدا مەكتەپ سالىنادى دەپ ۋادە بەرىلگەن، ءتىپتى جوباسى جاسالىپتى.
«جەر العان كەزدە بۇرىنعى اكىم، وسى جەردە مەكتەپ بولادى، جوسپاردا بار دەگەن. ول مەكتەپتى باسقا جەرگە سالايىن دەپ تۇر، ايتىلعان جەردە تەلىم جوق دەپ. ءبىز سوعان قارسىمىز. ۋادە بەرىلگەن ورىنعا 1500 ورىندىق مەكتەپ سالىپ بەرسىن»، – دەدى قازسيك اۋىلىنىڭ تۇرعىنى ارال ەشماحانوۆ.
حالىقتىڭ قارسى بوپ وتىرعانى – ورتالىقتاعى، جاڭا ستاديوننىڭ ورنىنا سالىناتىن مەكتەپ. جوسپارداعى ءبىلىم ورداسىنىڭ بيىل قۇجاتى رەتتەلىپ، كەلەر جىلى قۇرىلىسى باستالاتىن كورىنەدى. "جاڭا مەكتەپ ەسكى ماسەلەنى جويمايدى، ودان دا الىس اۋدانعا سۇراعانىمىزدى سالسىن" دەيدى كوپشىلىك.
«ايىنا 20 مىڭ تەڭگەگە ءبىر بالاعا جەتكىزۋشى كولىك جالدايمىز. مەنىڭ 2 بالام بار. كوكتەم كەزىندە جەتكىزۋشى كولىكتەر كەلىسپەيدى كەلۋگە، سەبەبى جول ناشار. بىلمەيمىن، قالاي تاسيمىز بالالارىمىزدى ساباققا؟»، – دەدى قازسيك اۋىلىنىڭ تۇرعىنى ايدا ءاليجانوۆا.
ۇيمەن اراسى كەمى 3 شاقىرىم بولاتىن جان-جاقتاعى 3 مەكتەپتە 4600 بالا وقيدى. ورىن جەتپەگەندىكتەن، ءۇش اۋىسىمدى جۇيە ءالى بار. ال اكىم ەل سۇراعان جەردىڭ مەملەكەت مۇلكى ەمەسىن ايتىپ وتىر.
قىسقاسى، 15 گەكتاردىڭ بەستەن ءبىرىن يەسىنەن الۋ ءۇشىن جوبا جاسالىپ، ءتيىستى ورىنعا جولدانىپتى. ناقتى شەشىم ءالى شىققان جوق.
«ەگەر جەر تەلىمىنىڭ يەسى مەملەكەت قويعان باعاعا كەلىسپەسە، وندا ءبىز سوت پروسەسى ارقىلى وسى جەردى مەملەكەت تاراپىنا قايتىپ الۋعا ارەكەت ەتەمىز. بۇل 15 گەكتار جەر. وسى ماسەلە بويىنشا شارالاردى جاساۋدى باستادىق. 3 گەكتار جەرگە 1500-1200 ورىندىق مەكتەپتى سالۋدى جوسپارلاپ وتىرمىز»، – دەدى قازسيك اۋىلدىق وكرۋگىنىڭ اكىمى باۋىرجان جۇمابايەۆ.
بۇل جوسپاردىڭ ناقتى قاشان جۇزەگە اساتىنى بەلگىسىز. «ەڭ جاقىن ۋاقىت – 2025 جىل» دەيدى اۋىل باسشىسى. ال ەل قارسى بولعان ورتالىقتاعى مەكتەپ ءبارىبىر سالىنادى، ويتكەنى ءۇش اۋىسىمدىقتى جويۋدىڭ ازىرگە جالعىز جولى – وسى.