سانيتارلىق-ەپيدەميولوگيالىق شەكتەۋلەر قولدانىلادى.
الماتىدا ءقاۋىپتى ىندەتتىڭ ورشۋىنە بايلانىستى 2021 جىلى قۇربان ايت مەرەكەسى ونلاين تۇردە وتەدى. مەرەكەدە ۇجىمدىق ناماز وقىلمايدى، يمامدار ۇيدە ناماز وقۋدى ۇسىندى، دەپ حابارلادى Almaty-akshamy.kz.
"بايكەن" مەشىتىنىڭ نايب يمامى نۇربولات دۇيسەبايەۆتىڭ ايتۋىنشا، بۇل شەشىم ەپيدەميولوگيالىق جاعدايدىڭ ۋشىعۋىنا بايلانىستى ەكەنىن مالىمدەدى. قۇربان ايتقا قۇرباندىق شالۋ قىزمەتىنە ونلاين تاپسىرىس بەرۋگە بولادى.
"qurban2021.kz سايتىندا قۇرباندىق شالۋ قىزمەتىنە تاپسىرىس بەرۋگە بولادى. بۇل جەردە ءوڭىردى مىسالى، الماتى قالاسىن تاڭداپ، كىمنىڭ اتىنان جاسالاتىن باعاندى تولتىرۋ ارقىلى ءوز تەلەفون ءنومىرىڭىزدى كورسەتۋ قاجەت. سودان كەيىن ەسەپ جىبەرىلەتىن بولادى. قۇرباندىق شالۋ تاپسىرىس بەرۋشىنىڭ اتىنان ناماز وقۋمەن وتەدى"، – دەدى نۇربولات دۇيسەبايەۆ.
قۇرباندىق شالۋعا ارنالعان جانۋاردىڭ باعاسى قازاقستان بويىنشا شەكتى بولىپ بەلگىلەنگەن: ۇساق مالدى 70 مىڭ تەڭگەدەن، ال ءىرى قارا مالدى 420 مىڭعا دەيىن ساتۋعا رۇقسات ەتىلگەن.
"بايكەن" مەشىتىنىڭ نايب يمامى بيىلعى جىلى ونلاين فورماتتا وتەتىن قۇربان ايت مەرەكەسىنىڭ سەبەبىن ءتۇسىندىردى.
"بۇگىندە كوروناۆيرۋس جۇقتىرىپ، اۋرۋحاناعا جاتقىزىلعان ادام كوپ. سوندىقتان ۇجىمدىق ءىس-شارا وتكىزۋگە تىيىم سالىنادى. سانيتارلىق-ەپيدەميولوگيالىق شەكتەۋلەر قولدانىلادى. بۇل مەرەكە كۇندەرىن وتباسىڭىزبەن وتكىزگەن دۇرىس، قابىلدانعان تالاپتارعا تۇسىنىستىكپەن قاراۋ كەرەك"، – دەپ كەڭەس بەردى نۇربولات دۇيسەبايەۆ.
الماتىدا 18 شىلدە كۇنى كوروناۆيرۋس ينفەكسياسىن جۇقتىرعان 798 جاعداي تىركەلدى. سونىڭ 706-سى سيمپتومسىز جانە 92ء-سى سيمپتومدى.
ينفەكسيالىق ستاسيونارلاردا 2 878 ادام بار، سونىڭ 209-ى بالا.