جاڭا باعىتتاعى ءبىر ساپاردىڭ باعاسى 2500 تەڭگە دەپ بەلگىلەنگەن.
الماتى مەن ىستىقكول اراسىنا جاڭا جول سالىنادى، دەپ حابارلايدى Almaty-akshamy.kz
سوچيدە ەۋرازيالىق دامۋ بانكىنىڭ ۇيىمداستىرۋىمەن ءوتىپ جاتقان ەۋرازيالىق كونگرەس’23 بارىسىندا «قازاقستاندىق مەملەكەتتىك-جەكە مەنشىك ارىپتەستىك ورتالىعى» اق باسقارما ءتوراعاسى سامات ساعىندىقوۆ الماتى مەن ىستىقكول اراسىن جالعايتىن جاڭا جول قۇرىلىسى باستالۋى مۇمكىن ەكەنىن مالىمدەدى.
«ءقازىر قازاقستان مەن قىرعىزستان الماتى مەن ىستىقكول اراسىندا بالاما جول سالۋ بويىنشا كەلىسسوز جۇرگىزىپ جاتىر. ازيا دامۋ بانكىنىڭ كونسۋلتانتتارى جوباعا زاڭدىق، تەحنيكالىق جانە قارجىلىق سكرينينگ جاسادى. ەگەر جوبا جۇزەگە اساتىن بولسا، وندا الماتىدان ىستىقكول وزەنىنە دەيىنگى جول 85 كم-گە جۋىق قاشىقتىقتى قۇرايدى. قازىرگى قاشىقتىق – 460 كم. شامامەن جوبا قۇنى 160 ملن دوللاردان اسىپ وتىر. ال تۋننەل سالۋ شىعىنىن قوسا ەسەپتەسە 600 ملن دوللاردان اسىپ كەتەدى. بىرنەشە ەلدىڭ رەسۋرسىن بىرىكتىرە وتىرىپ ترانسشەكارالىق ءمجا جوبالاردى جۇزەگە اسىرۋ جاڭا ءوسىم نۇكتەسىن تابۋعا ىنتالاندىرادى»،-دەدى ول.
ونىڭ سوزىنشە، جوبانىڭ جۇزەگە اسۋى قازاقستان ازاماتتارى ءۇشىن ۇلكەن تيىمدىلىك الىپ كەلمەك: ەل تۇرعىندارى اۋەلى جانار-جاعارماي مەن ۋاقىتىن ۇنەمدەيدى جانە بۇرىنعىداي ۇزاق ءجۇرىپ كولىكتەرىن دە شارشاتپايتىن بولادى.
جاڭا باعىتتاعى ءبىر ساپاردىڭ باعاسى 2500 تەڭگە دەپ بەلگىلەنگەن. ءبىراق كولىك تۇرىنە بايلانىستى قۇن وزگەرۋى مۇمكىن. جولدىڭ نەگىزگى بولىگىندەگى جىلدامدىق – ساعاتىنا 150 كم دەپ بەلگىلەنسە، تاۋلى ايماقتاردا ساعاتىنا 30 كم-دەن اسىرۋعا بولمايدى.