الماتى وبلىسىندا 42 شاقىرىمدىق "ۇزىناعاش - وتار" جولى پايدالانۋعا بەرىلدى.
اتالعان جولدىڭ ىسكە قوسىلۋىمەن ماگيسترالدى جاڭارتۋ تولىعىمەن اياقتالدى. ەندى الماتىدان شىمكەنتكە دەيىنگى جول تولىق ءتورت جولاقتى بولىپ، ءجۇرىپ-تۇرۋ الدەقايدا ىڭعايلى بولماق، - دەپ حابارلايدى Aqshamnews.kz Astanatv.kz-كە سىلتەمە جاساپ.
اشىلۋ سالتاناتىنا ق ر كولىك ۆيسە-مينيسترى ماقسات قالياقپاروۆ، الماتى وبلىسى اكىمىنىڭ ورىنباسارى رۋستام يساتايەۆ جانە ءوڭىر اقساقالدارى قاتىستى. راسىمدە قوزعالىستى باستاۋ باتىرماسى باسىلىپ، جاڭا جول ارقىلى العاشقى بولىپ 15 كولىكتەن تۇراتىن اۆتوكولوننا ءجۇرىپ ءوتتى.
بيىل ءبىز ەل بويىنشا 13 مىڭ شاقىرىم جولدا جوندەۋ جانە قايتا جاڭارتۋ جۇمىستارىن جۇرگىزۋ ارقىلى رەكوردتىق ناتيجەگە قول جەتكىزدىك. بۇل – مەملەكەت باسشىسىنىڭ قولداۋى مەن جول سالاسىنىڭ قىزمەتكەرلەرىنىڭ كۇندەلىكتى اتقارىپ جۇرگەن ەرەن ەڭبەگىنىڭ ارقاسى. ولار ازاماتتار ءۇشىن ءقاۋىپسىز، ءارى ىڭعايلى جولدار سالىپ، وڭىرلەردىڭ دامۋىنا جاڭا مۇمكىندىكتەر اشۋدا»، – دەدى ءىس-شارا بارىسىندا كولىك ۆيسە-مينيسترى ماقسات قالياقپاروۆ.
سونىمەن قاتار جولدى اشۋ سالتاناتىنىڭ اياسىندا جوبانى ىسكە اسىرۋعا ەرەكشە ۇلەس قوسقان جۇمىسشىلار ماراپاتتالدى. ولارعا ۆەدومستۆولىق مەدالدار، العىس حاتتار جانە كولىك مينيسترلىگىنىڭ قۇرمەت گراموتالارى تابىستالدى.
ايتا كەتەيىك، بۇگىن اشىلعان «ۇزىناعاش – وتار» كۇرە جولىندا نەگىزگى قۇرىلىس-مونتاج جۇمىستارى وتكەن جىلى باستالىپ، نەبارى ەكى جىلدا تولىق اياقتالدى. جوباعا 163 بىرلىك تەحنيكا، 290 مامان جۇمىلدىرىلىپ، ەكى اسفالت-بەتون زاۋىتى مەن ءتورت جول-قۇرىلىس باسقارماسى جۇمىس ىستەدى.
42 شاقىرىمدىق «ۇزىناعاش – وتار» تاسجولىنىڭ اشىلۋىمەن الماتى مەن شىمكەنت اراسىنداعى جول تولىق ءتورت جولاقتى بولىپ، ءجۇرىپ-تۇرۋ الدەقايدا ىڭعايلى، ءارى ءقاۋىپسىز بولماق. بۇل ماگيسترالدىڭ وتكىزۋ قابىلەتىن ارتتىرىپ، جول ءجۇرۋ ۋاقىتىن قىسقارتادى، قوزعالىس قاۋىپسىزدىگىن جاقسارتادى جانە وڭىرلەر اراسىنداعى كولىك بايلانىستارىن نىعايتىپ، ورتالىق ازيا مەملەكەتتەرىمەن ەكونوميكالىق قاتىناستاردى ودان ءارى كۇشەيتەرى ءسوزسىز.